ಇಂಚಿಪ್ಪ ಕುಡ್ಲದ ಕರಾವಳಿ ಲೇಖಕಿಯರ ಮತ್ತು ವಾಚಕಿಯರ ಸಂಘದ ಒಂಜಿ ಲೇಸ್ ಎನ್ನ ಊರುಡು ಶ್ರೀ ಮಾತಾ ಕಲಾ ಮಂದಿರ ಡ್ ನಡತ್ಂಡ್. ಯಾನ್ಲಾ ಬಿನ್ನೆದಿಯೊದ್ ಪೋದಿತ್ತೆ. ಅಪಗ ಅಕುಲು ನೆಂಪುದ ಸೇಜ ಪಂಡ್ದ್ ಕೆಲವು ಮಸ್ತಿರೆನ್ ಮಾತೆರೆಗ್ಲಾ ಪಟ್ಯೆರ್. ಎಂಕೊಂಜಿ ಕನ್ನಡದ ಮಸ್ತಿರೆ ತಿಕ್ಕ್ದಿತ್ತ್ಂಡ್. ಮಾನಾದಿಗೆದ ಮರ್ಯಾದಿ ಕೊರ್ನೆನ್ ಮೋಕೆಡ್ ಪತೊಂದು ಲೇಸ್ ಮುಗಿದ್ ಪಿದಡ್ನಗ ಕುಡ್ಲದ ರತ್ನಾವತಿ ಜೆ. ಬೈಕಾಡಿ ಟೀಚರೆನ ಕೈಟ್ ಎನ್ನ ಕಣ್ಣ್ಗ್ ‘ಗೆಜ್ಜೆತ್ತಿ’ ತೋಜಿಂಡ್. ಯಾನ್ ಎನ್ನ ಕೈಟಿತ್ತಿನ ಮಸ್ತಿರೆನ್ ಅರೆಗ್ ಕೊರ್ದು ಅಯಿನೆಂಕ್ ಕೊರ್ಪರಾಂದ್ ಕೇಂಡೆ, ಆರ್ ಮಸ್ತ್ ಸಂತೊಸುಡೇ ಬೂಕುನು ಎಂಕ್ ಕೊರ್ದು ಎನಡಿತ್ತಿನೆನ್ ಪಗತೆಗ್ ದೆತೊಂಡೆರ್. ಇಲ್ಲಡೆ ಕನತ್ದ್ ಸುಮಾರ್ ದಿನೊಟು ಬುಡ್ಪಾಯೆರೆ ಎಲ್ಯ ತಿಕ್ಕಿಜಿ, ಇನಿ ಬುಡ್ಪಾಯೆ.
ಗೆಜ್ಜೆತ್ತಿ ಪಂಡ ಉಂದು ತುಲುನಾಡ ಮದಿಮಲ್ ಪೊಣ್ಣನ ಕೈಟ್ ಕೊರ್ಪುನ ಬೊಲ್ಲಿದ ಗೆಜ್ಜತ್ತಿ ಅತ್ತ್!! ಉಂದು ಒಂಜಿ ಮಲ್ಲಶಾಲೆಡ್ ಒಂಜಾತ್ ಕಲ್ಪಾದಿಲೆಗ್ ಬರವು ಸರವುನು ಕಲ್ಪಾವುನ ಪೆರ್ಮೆದ ಕಲ್ಪಾದಿಯಾಯಿನ ಸಿರಿಮತಿ ಜ್ಯೋತಿ ಚೇಳ್ಯಾರ್ ಬೆರೆತಿವೆ ಕಬಿತೆಲೆನ ಗೊಂಚಿಲ್. ಪುದರೇ ಪನ್ಪುನಲೆಕ ಬೂಕುಗೊಂಜಿ ಬಚ್ಚಿರೆ ಬಜ್ಜೈದೊಟ್ಟಿಗೆ ಗೆಜ್ಜೆತ್ತಿ ಪತ್ತಿನ ಮದಿರೆಂಗಿ ರಂಗೇರಿನ ಮದಿಮಲೆನ ಅಂಗೈತ ಮೋನೆಪಟ ತೂನಗನೇ ಈ ಮಸ್ತಿರೆತ ಪಾಲೆದುಲಯಿ ತುಲುನಾಡ್ದ ಪೊರ್ಲು ಪೊಲಿಕೆ ದಿಂಜಿದುಪ್ಪೂಂದು ಅಂದಾಜಿ ಆಪುಂಡು.
ಪಾಲೆ ಮಗ್ತೊಂದು ಪೋನಗ ಸುದ್ದ ಮುದ್ರಿಗೆದ ದಲ್ಯ ಪೊಣ್ಣ ಸಂತೆಸಿದ ಪೆರ್ಮೆನ್ ದೆರ್ತ್ ತೋಜಾವೊಂದು ಬೂಲ್ಯದಾಂತೆ ದಲ್ಯಗುಂತಿನ ಪೊಣ್ಣು ಬದ್ಕ್ದೊಂಜಿ ಓಲ್ಯ ಆಯಿಲ್ ಪನ್ನಗ ಪೊಸಪುಟ್ಟುಗು ಸಾದಿ ತೋಜಾವುಂಡು. ಅರ್ಕೆಲರ್ಕೆಲ್ ಮೋಕೆದ ಕುರ್ಕಿಲ್ ಮಟ್ಟೆಲ್ ಓದುನಗನೇ ಮಟ್ಟೆಲ್ದ ಎಚ್ಚೆಲ್ಮೆಪನಿಯೆರೆ ಪದೊ ತಿಕ್ಕುಜಿ. ಮಾರ್ಗ ಸೋಕು ಮನ್ಪುನ ಗೌಜಿಡ್ ನಾಶ ಆಯಿನ ಪಸಂತ್ರೊದ ಬಗೆಟ್ ಬಂಜಿಪೊತ್ತಾವುನಕುಲಿಜ್ಜಿ ಪನ್ಪುನನೇ ಸಿಂಗೊಡೆ ಸಂಕ್ರಂದಿ ಕಬಿತೆದ ಉಲತಿರ್ಲಾದುಂಡು. ಒಂಜಾತ್ ಕಬಿತೆಲು ತುಲುನಾಡ್ ಒರ್ಬೊಡಿ ತಿರ್ಗಾದ್ ಕನಪುಂಡು, ಮೂಲು ದೈವ ದೇವೆರುಲ್ಲೆರ್, ಬೆನ್ನಿ ಬದ್ಕುಂಡು, ಅಂಕ ಆಯನ, ಕೋಲ ಕಂಬುಲ, ಬಂಡಿ ಜಾತ್ರೆ, ಮಾತಲಾ ಉಂಡು, ಅಯಿತೊಟ್ಟಿಗೆ ತುಲುನಾಡ್ದ ಬಡಪತ್ತ್ದ ದಿನೊನು ನೆಂಪು ಮನ್ಪುನ ‘ಪರ್ಬ ಗದ್ದಲ ಬಜಿಲ್ ಮುಕ್ಕಂಡೆ’ ಏತ್ ಉಲತಿರ್ಲ್ ದಿಂಜಿನ ಪಾತೆರ. ಅಜ ತಪ್ಪಂದಿ ಪತ್ತನಾಜೆ ಪುಂಡಿ ಬಿತ್ತ್ ಪಾರಾದ್ ಬೆನ್ನಿನ್ ಎದ್ಕೊನಿನ ಸುರೂತ ಬರ್ಸದ ದಿನನ್ ನೆಂಪು ಮಂತ್ಂಡ್. ಅಂದ್ ಅನಿ ಪೊಡಿನೇಜಿ ಪಾಡ್ದ್ ಪಲಯಿ ಮುಟ್ಟುನಗ ಪಲಯಿಡ್ ಕುಲ್ಲೆರೆ ಎಂಕುಲು ಕಟ್ಟಪುಣಿಟ್ ಸಾಲ್ ಉಂತೊಂದಿತ್ತಿನಿ, ಒರಿಯಗ್ ಒಂಜಿ ಸುತ್ತೂಂದು ಅಮ್ಮೆರ್ ಪಲಯಿಡ್ ಕುಲ್ಲಾವುನಿ, ಅಲೆಗ್ ರಡ್ಡ್ ಸುತ್ತಾಂಡ್ ಎನನ್ ಒಂಜೇ ಸುತ್ತು ಕುಲ್ಲಾಯಿನೀಂದ್ ಚೊರೆ, ಏತೊಂಜಿ ಪೊರ್ಲುದ ನೆಂಪುಲು. ಕಬಿತೆ ಬದ್ಕ್ಡ್ ಕರಿನ ದಿನೊತ ನೆಂಪುದ ಕಬಿತೆದ ಕಟ್ಟ್ ಗಿರ್ಪಾಂಡ್. ಚಾಲಗೇಣಿ, ಮೂಲಗೇಣಿದ ಲೆಕ್ಕ ತೌತೆ, ತುರೆ, ಬದನೆ ಬುಲೆಕಾಣಿಕೆ ದುಂಬುದೀದ್ ಅರಣಿಗೆಡ್ ಸಂದಾಯಿನ ಬಿಸುಪರ್ಬ, ಕುಲೊ ಕಸುಬುದ ಪಿರವು ಆವೆದ ಬೆಪ್ಪುದ ಮರ್ಕಸಂಕಡ ಆವೆ ಕಬಿತೆಡ್ ಕಣ್ಣ್ಗ್ ಕಟ್ಟಾದೆರ್. ಪೊಣ್ಣ ಮಾನೊಗು ಕಾಪು ಕಟ್ಟ್ದಿ ಗೆದ್ದೆತ್ತಿ ಕಬಿತೆ ಗೆಜ್ಜೆತ್ತಿದ ನಿಲೆಬಿಲೆನ್ ದೇರ್ತ್ ಪತ್ತುನೆತ ಒಟ್ಟಿಗೆ ಇನಿಕೋಡೆದ ದಿನಮಾನೊಡು ಪೊಣ್ಣು ಅನ್ನಯೊಗು ಎದುರುಂತೊಡಾಂಡ ಗೆಜ್ಜೆತ್ತಿದಂಚೆನೆ ಎಡ್ಡೆ ಪರ್ತ್ತೆದ ಸಾದಗ ವಿದ್ಯೆದ ಅಗತ್ಯನು ತೆರಿಯೊನುಲೆಕ ನಮ್ಮ ಅಲೆಚನೆನ್ ಅಂಚಿಗ್ ಬುಡ್ದೇರುಂಡು. ಪೆರಡೆ ಲಾಕಿ ಕಬಿತೆ ಮೆಲ್ ಮೇಲ್ ತೂನಗ ಒಂಜಿ ಕೋರಿದ ಬಗೆಟ್ ಬರೆತಿನ ಕಬಿತೆದ ಲೆಕ ತೋಜಿಂಡಲಾ ಅವು ಒಂಜಿ ಪೊಣ್ಣ ಬದ್ಕ್ದ ಸುತ್ತ ಮೊಡೆತಿನ ಕಬಿತೆ ಆದ್ ತನ್ನ ವಿಶ್ವರೂಪನ್ ತೋಜಾವುಂಡು. ಜಾಲ್ ಮುಂದಿಲ್ಡ್, ಬುತ್ತಿ ಬಿನ್ನೆರ್ ಕೈ ಕಾರ್ ದೆಕ್ಕೆಗೆ ನೀರ್ ದಿಂಜಾದ್, ಒಂಜಿ ರೊಂಕ ಪಾಡ್ದ್ ಬುಡ್ಪೆದಿನ ಪೆದಂಗರೆತ ಜಾಗೆಗ್ ಸುರು ಸುರು ಕರ್ಬ ಎಲಿಮಿನ್ ದ ಬಾಲ್ದಿ ಬತ್ತ್ದ್ ಇತ್ತೆ ರಂಗ್ ರಂಗ್ದ ಪಿಲಾಸ್ಟಿಕ್ ಬಾಲ್ದಿಲು ಬತ್ತ್ದ್ ಪೆದಂಗರೆನ್ ಜನಮಂದೆದ ಉಡಲ್ರ್ದ್ ಮಾಜಾದೇ ಬುಡುಂಡು ಪನ್ನಗ ಟೀಚರ್ ಪೆದಂಗರೆ ಕಬಿತೆಡ್ ಅಯಿನ್ ಕುಡ ಜೂವಪ್ಪ ಒರಿಪೆರೆ ತೂಯೆರ್, ಉಂದು ಉಡಲ್ಗ್ ತಲ್ಮೆನ ಕೊರ್ಪುನ ವಿಷಯ.
ಬೊಕ್ಕ ಒಂಜಿ ಕಬಿತೆ ನಾಲ್ ನಾಲ್ ಸರ್ತಿ ಓದುಂಡಲಾ ಕಡೆಮುದೆಲ್ ತೆರಿಯುಜಿ, ಮೈತ ರೋಮ ಕೊಕ್ಕೆರುಂಡು, ಆಲೋಚನೆ ಗಿರ್ಗಿಟ್ ತಿರ್ಗಾವುಂಡು, “ಪಿಲಿ ಬಣ್ಣದ ಸೀರೆಗ್ ಬಲಿಪ ಬಣ್ಣದ ರಾಕೆ!!!” ಅಬ್ಬಾ!!! ನಿಜವಾದ್ಲಾ ಆಚಿರಾಪುಂಡು!! ವಾ ನಮುನೆದ ಮ್ಯಾಚಿಂಗ್!!! ಅಂಚಿ ಮಂಜಲಾ…,ಇಂಚಿ ಕಪ್ಪುವಾ….,ಪಟ್ಟೆನಾ…ಅತ್ತ್ ಪುಲ್ಲಿಯಾ….!! ಏರಾಂಡ ಓದುದೊರ ಪನ್ಲೆ ಎಂಕ್…ಪ್ಲೀಸ್…, ತೋಡ ಬರಿತ ಸೊರಗೆ ಕಮ್ಮೆನ ಲಕ್ಕಾವುಂಡು, ನೆಟ್ಟಿತ್ತಿನ ಮಾತಾ ಕಬಿತೆಲುಲಾ ತುಲು, ತುಲು ಬದ್ಕ್, ತುಲು ನಾಡ್ ಪೂರಾ ತಿರ್ಗಾಂಡ ಒಟ್ಟಿಗೆ ಮಂಡೊದರಿ ಲಾ ಚಾಂದಿನಿ ಲಾ ಕಟ್ಟದ ಕೋರಿದ ಕಜಿಪುಗು ನೆಸಲ್ ಪಾಡಿಲೆಕ ಆತ್ಂಡ್. ಒಂಜಾತ್ ಮದೆಕ್ ಪೋಪುನ ತುಲು ಪದೊಕುಲೆನ್ ಈ ಮಸ್ತಿರೆಟ್ ಒರಿಪುನ ಪ್ರಯತ್ನ, ಪಜಿ ಪಜಿ ಹಳ್ಳಿದ ತುಲು ಬಾಷೆ ಒಟ್ಟಿಗೆ ಸಾಂಟ್ ಪೋಯಿನ ದುಂಬುದ ನೆರಡೆಲಾ ಉಂಡು, ಒರ ಮೋನೆಡ್ ಮುಗುರು ತೆಲಿಕೆ ರಟ್ಟಾಂಡ್.
ಜ್ಯೋತಿ ಟೀಚರೆನ ಬರವುದ ಬಗೆಟ್ ಬರೆಪುನಾತ್ ಮಲ್ಲೆ ಯಾನತ್ತ್, ಆಂಡ ತುಲು ಬರವುನು ಓದುನ ಮರ್ಲ್ ಓದಿನೆತ ಬಗ್ಗೆ ಪಾತೆರ್ಪಾವುಂಡು. ಪಾತೆರೆರೆ ಮುಟ್ಟ ಏರ್ಲ ಇಜ್ಜಂದಿನೆಟ್ ಪಾತೆರನ್ ಬರವುಗು ಕನತೆ. ದಾದಾಂಡಲ ಎತ್ತಿ ಕಮ್ಮಿ ಇತ್ತ್ಂಡ ಟೀಚರೆನ ಮಲ್ಲ ಮಟ್ಟೆಲ್ಗ್ ಪಾಡೊನುವೆರ್ಂದ್ ನಂಬೊಲಿಕೆ ಉಂಡು.
ಗೆಜ್ಜೆ ಕತ್ತಿ ಒಂಜಿ ಕಾಲೊಡು ಪೊಣ್ಣ ಸಂತೆಸಿದ ಆತ್ಮರಕ್ಷಣೆದ ಸೊತ್ತಾದ್, ತುಲುನಾಡ್ದ ದೈವರಾಧನೆಡ್ ತನ್ನಿಮಾಣಿಗನ ಕೈಟ್ ಕಾರ್ನಿಕ ಬೆಂದಿನ ಗೆಜ್ಜೆ ಕತ್ತಿಗ್ ಸೂರ್ಯ ಚಂದ್ರೆರಿತ್ತಿನಾತ್ ದಿನ ತುಲುನಾಡ್ ಡ್ ಇಸೇಸ ತಾನ ಮಾನ ಉಪ್ಪುಂಡು, ಅಂಚೆನೆ ಜ್ಯೋತಿ ಟೀಚರೆನ ಈ ಬರವುದ ಪೊದಿಕೆ ತುಲುವೆರೆ ಉಡಲ್ ಗೆಂದಡ್, ನನಲಾತ್ ತುಲು ಬರುವುದು ಪೊದಿಕೆಲು ತುಲುವಪ್ಪೆನ ಸಿರಿಮುಡಿಕ್ ಸಂದೈತ ಆವಡ್ಂದ್ ಎಡ್ಡೆಪ್ಪು ಬಯಕುವೆ.
ಕುವಿಕು ಕಣ್ವತೀರ್ಥ
05-03-2026
