ಮಂಗಳೂರು : ಕಲಾಸೂರ್ಯ ನೃತ್ಯಾಲಯ ಮಂಗಳೂರು ಆಯೋಜಿಸುತ್ತಿರುವ ‘ಕಲಾಭವ’ ಮಾಸಿಕ ನೃತ್ಯ ಸರಣಿ-07 ಹಾಗೂ ರಾಮನವಮಿ ವಿಶೇಷ ಕಾರ್ಯಕ್ರಮವು ದಿನಾಂಕ 29 ಮಾರ್ಚ್ 2026ರಂದು ಮಂಗಳೂರಿನ ಸುಬ್ರಹ್ಮಣ್ಯ ಸದನದಲ್ಲಿ ನಡೆಯಿತು. ಈ ಕಾರ್ಯಕ್ರಮದಲ್ಲಿ ಮೂಕಾಂಬಿಕಾ ಕಲ್ಚರಲ್ ಅಕಾಡೆಮಿ ಪುತ್ತೂರು ಇಲ್ಲಿನ ‘ಕಲಾದೀಪ’ ವಿದ್ವಾನ್ ಬಿ. ದೀಪಕ್ ಕುಮಾರ್ ಹಾಗೂ ವಿದುಷಿ ಪ್ರೀತಿಕಲಾ ಇವರಿಂದ ಸಂಪೂರ್ಣ ರಾಮಾಯಣ ಪ್ರಸ್ತುತಿ ನಡೆಯಿತು.
ಕಾರ್ಯಕ್ರಮವನ್ನು ದೀಪ ಬೆಳಗಿಸಿ ಉದ್ಘಾಟಿಸಿದ ಶ್ರೀಯುತ ಕೃಷ್ಣಪ್ರಕಾಶ್ ಉಳಿತ್ತಾಯ ಇವರು ಕಾರ್ಯಕ್ರಮದ ಬಗ್ಗೆ ಬಹಳ ಮೆಚ್ಚುಗೆ ವ್ಯಕ್ತಪಡಿಸಿದರಲ್ಲದೆ, ಶಿವ ಪಾರ್ವತಿಯರ ಜೋಡಿ ಒಂದು ಯೋಗದಿಂದ ಕೂಡಿದ್ದಂತೆ, ದೀಪಕ್ ಕುಮಾರ್ ಹಾಗೂ ಪ್ರೀತಿಕಲಾರವರ ಜೋಡಿ ಕೂಡಾ ಯೋಗ ಇದ್ದದ್ದರಿಂದ ಮಾತ್ರ ಸಾಧ್ಯವಾಗಿದೆ ಎಂದರು. ರಾಮಾಯಣ ನೃತ್ಯದಲ್ಲಿ ನವರಸಗಳನ್ನು ಒಳಗೊಂಡಂತೆ, ಹತ್ತನೇ ರಸವಾದ ವಾತ್ಸಲ್ಯ ರಸವನ್ನು ನಾನು ಅನುಭವಿಸಿದೆ ಎಂದು ಅವರು ಹೇಳಿದಾಗ ಕಲಾವಿಧರ ಪ್ರೌಡಿಮೆ ಎಂತದ್ದು ಎಂಬುದು ಅನಾವರಣವಾಯಿತು. ಕಾರ್ಯಕ್ರಮ ಆಯೋಜಿಸಿದ ಕಲಾಸೂರ್ಯ ನೃತ್ಯಾಲಯವನ್ನು ಎಲ್ಲರೂ ಮನಪೂರ್ವಕ ಶ್ಲಾಘಿಸಿ ಹರಸಿದರು.
ಸುಬ್ರಮಣ್ಯ ಸಭಾದ ಅಧ್ಯಕ್ಷರಾದ ಡಾ. ಎ.ಪಿ. ಕೃಷ್ಣ ಅನುಭವ ಹಂಚಿಕೊಂಡು ತಮ್ಮ ಸಹಕಾರ ಸದಾ ಇದೆ ಎಂದು ನುಡಿದರು. ಕಾರ್ಯದರ್ಶಿ ಉದಯ ಕುಮಾರ್ ರಾವ್, ಜೊತೆ ಕಾರ್ಯದರ್ಶಿ ಸಂತೋಷ್ ಕುಮಾರ್ ಉಪಸ್ಥಿತರಿದ್ದರು. ಕುಮಾರಿ ಮಾತಂಗಿ ಇವರಿಂದ ರಾಮನ ಪ್ರಾರ್ಥನೆಯೊಂದಿಗೆ ಪ್ರಾರಂಭಗೊಂಡ ಕಾರ್ಯಕ್ರಮದಲ್ಲಿ ಶ್ಯಾಮ್ ಇವರ ಓಂಕಾರನಾದ, ಶ್ರೀಲಕ್ಷ್ಮಿ ಇವರ ಶಂಖನಾದ, ಕುಮಾರಿ ಶ್ರೇಯ ಬಾಪಟ್ ಇವರ ಪಂಚಾಂಗ ಪಠಣ ವೇದಿಕೆಯಲ್ಲಿ ದೈವೀಕ ವಾತಾವರಣ ಸೃಷ್ಟಿಸಿತು. ಕಲಾಸೂರ್ಯ ನೃತ್ಯಾಲಯದ ಸಂಚಾಲಕರಾದ ವಿಕ್ರಮ್ ಪಡುವೆಟ್ನಾಯ ಸ್ವಾಗತಿಸಿ, ನೃತ್ಯಾಲಯದ ನೃತ್ಯಗುರು ಸೌಜನ್ಯ ಪಡುವೆಟ್ನಾಯ ಕಾರ್ಯಕ್ರಮ ನಿರೂಪಿಸಿದರು.
