ಉಡುಪಿ : ರಥಬೀದಿಯ ನಂಜನಗೂಡು ಮೂಲದ ಶ್ರೀ ರಾಘವೇಂದ್ರ ಸ್ವಾಮಿ ಮಠದಲ್ಲಿ ದಿನಾಂಕ 29, 30 ಮತ್ತು 31 ಆಗಸ್ಟ್ 2026 ಮೂರೂ ದಿನಗಳ ಆರಾಧನೆ ಸಕಲ ಸಂಭ್ರಮಗಳಿಂದ ಕೂಡಿತ್ತು. ಶನಿವಾರ ಗುರುರಾಯರಿಗೆ ಸಲ್ಲಿಸಲಾದ ಗಾನಾರ್ಪಣೆಯಲ್ಲಿ ಸಂಜೆ ಎರಡು ತಾಸು ಭಟ್ಕಳದ ಪಂಡಿತ್ ಗಜಾನನ ಹೆಬ್ಬಾರ್ ಇವರ ಹಿಂದೂಸ್ತಾನಿ ಗಾಯನಕ್ಕೆ ಹೆಸರಾಂತ ತಬಲಾ ಗುರು ಬ್ರಹ್ಮಾವರದ ಪಂಡಿತ್ ರಾಘವೇಂದ್ರ ಭಟ್ ಇವರ ತಬಲಾ ಸಾಥ್ ವಿನೂತನ ಮೆರುಗನ್ನು ನೀಡುವಲ್ಲಿ ಸಹಕಾರಿಯಾಗಿತ್ತು. ಹಾರ್ಮೋನಿಯಮ್ ನಲ್ಲಿ ಮಣಿಪಾಲದ ಪಂಡಿತ್ ಶಶಿಕಿರಣ್ ಹಾಗೂ ಮಂಜಿರಾದಲ್ಲಿ ರವೀಶ್ ಕಾಮತ್ ಸಾಥ್ ನೀಡಿದರು.
ಸೋಮವಾರ ಸಂಜೆ ಗುಂಡಿಬೈಲಿನ ಶ್ರೀ ಅಭಿರಾಮಧಾಮ ಸನಾತನ ಸಂಸ್ಕಾರ ಕೇಂದ್ರದ ಕಲಾಭಾರತೀ ನಾಟ್ಯಶಾಲೆಯ ಗುರು ನಾಟ್ಯವಿದುಷಿ ಸುಷ್ಮಾ ಸುದರ್ಶನ್ ಇವರ ಹತ್ತಾರು ಶಿಷ್ಯರಿಂದ ‘ನರ್ತನ ನಮನ’ ಆಯೋಜಿಸಲಾಗಿತ್ತು. ವಿವಿಧ ಕೃತಿಗಳಾದ ‘ಶರಣಂ ಶರಣಂ ಪಾಲಯಮಾಮ್ ಶ್ರೀ ಗುರುರಾಘವೇಂದ್ರ ಕೃಪಾಂಬುಧೇ….’, ‘ತುಂಗಾತೀರದಿ ನಿಂತ ಯತಿವರನ್ಯಾರೇ ಪೇಳಮ್ಮಯ್ಯ ಪೇಳಮ್ಮಯ್ಯ ..’, ‘ನಂದ ನಂದನ ಕೃಷ್ಣಾ..’ ಮುಂತಾದ ಏಳೆಂಟು ನೃತ್ಯ ಬಂಧಗಳು ನೆರೆದಿದ್ದ ಅಸಂಖ್ಯಾತ ಭಕ್ತಸಮೂಹವನ್ನು ರಂಜಿಸಿದವು. ಅದಕ್ಕೂ ಮುನ್ನ ಸುಮಾರು ನೂರು ನಿಮಿಷಗಳ ಕಾಲ ‘ದಾಸೋಹಂ ತವ ದಾಸೋಹಂ’ ಎಂಬ ಶೀರ್ಷೀಕೆಯಡಿಯಲ್ಲಿ ಸಮರ್ಪಿತವಾದ ದಾಸವಾಣಿ ಗಾಯನ ಭಕ್ತಿಯ ಸಿಂಚನವನ್ನೇ ಉಣಬಡಿಸಿದ ಅನುಭವ ನೀಡಿತ್ತು.
ಶ್ರೀ ಅಭಿರಾಮ ಧಾಮದ ಸಂಸ್ಥಾಪಕ ಅಧ್ಯಕ್ಷರಾದ ಪರ್ಲತ್ತಾಯ ಡಾ. ಸುದರ್ಶನ ಭಾರತೀಯ (ವೆಂಕಟ ವಿಠ್ಠಲ ಸುಗುಣ ದಾಸರು) ಗಾಯನದಲ್ಲಿ, ವಿದುಷಿ ಲಲಿತಾ ಶ್ರೀರಾಮ್ ಹಾರ್ಮೋನಿಯಮ್ ನಲ್ಲಿ ಹಾಗೂ ವಿದ್ವಾನ್ ಗುರುದತ್ ತಬಲಾದಲ್ಲಿ ಒಂದು ಡಜನ್ ಅಪರೂಪದ ಮತ್ತು ಪ್ರಚಲಿತ ದಾಸರಪದಗಳನ್ನು ಪ್ರಸ್ತುತ ಪಡಿಸಿ ಶ್ರೀಮಠದ ಸನ್ಮಾನಕ್ಕೆ ಪಾತ್ರರಾದರು. ಮೊದಲಿಗೆ ನಾಟ ರಾಗದಲ್ಲಿ ಉಡುಪಿಯ ಮಹಾಮಹಿಮ ಶ್ರೀ ವಾದಿರಾಜ ಗುರುಸಾರ್ವಭೌಮರ ಕೃತಿ ‘ಜಯ ಇನಕುಲೋಧ್ಧರಣ ಜಯ ಮುನಿಕೃತಾ ಚರಣ’, ಅಹಿರ್ ಭೈರವ್ ರಾಗದ ‘ಪಿಬರೇ ರಾಮರಸಂ..’ ಸಂಸ್ಕೃತ ಗೀತೆ, ಅಮೃತವರ್ಷಿನಿ ರಾಗದಲ್ಲಿ ‘ಯಾಕೆ ಕಕ್ಕುಲಾತಿ ಪಡುವೆ, ಎಲೆ ಮನವೆ..’, ರೇವತಿ ರಾಗದಲ್ಲಿ ‘ಕಣ್ಣಿನೊಳಗೆ ನೋಡೊ..ಹರಿಯ ಕಣ್ಣಿನೊಳಗೆ ನೋಡೊ..’, ಮೋಹನ ರಾಗದಲ್ಲಿ ‘ಹ್ಯಾಂಗೆ ಬರೆದಿತ್ತೊ ಪ್ರಾಚೀನದಲ್ಲಿ..ಹಾಂಗೆ ಇರಬೇಕು ಸಂಸಾರದಲ್ಲಿ’, ‘ಇಷ್ಟು ದಿನ ಈ ವೈಕುಂಠ….ಎಷ್ಟು ದೂರವೋ ಎನ್ನುತಲಿದ್ದೆ..’ ಕೃತಿಗಳಲ್ಲಿ ಸುಗುಣದಾಸರು ಅಂದಿನ ಹರಿದಾಸರ ಭಕ್ತಿವಾಂಛೆಯ ಸಹಜ ಪ್ರಸ್ತುತಿ ಮಾಡಿ ಧನ್ಯತೆ ಪಡೆಯುತ್ತಿದ್ದುದನ್ನು ನೆರೆದ ಜನತೆ ಗಮನಿಸಿದರು. ಒಟ್ಟಾರೆ ಅಭಿರಾಮ ಧಾಮದ ಅಷ್ಟೂ ಸಮರ್ಪಣೆಗಳು ಶ್ರೀ ಗುರುರಾಯರ ಕೃಪೆಯಿಂದ ಜನಮಾನಸವನ್ನು ಮುಟ್ಟುವಲ್ಲಿ ಸಫಲವಾದುವು.
