ಉಡುಪಿ : ಭಾವನಾ ಪೌಂಡೇಶನ್ (ರಿ.) ಹಾವಂಜೆ ಹಾಗೂ ಭಾಸಗ್ಯಾಲರಿ ಮತ್ತು ಸ್ಟುಡಿಯೋ ವತಿಯಿಂದ ಉಡುಪಿಯ ಮಧುರಂ ವೈಟ್ ಲೋಟಸ್ ಹೋಟೇಲ್‌ನ ಸಹಯೋಗದಲ್ಲಿ ಆಯೋಜಿಸುತ್ತಿರುವ ಜನಪದ ದೇಶೀಯ ಕಲೆಗಳ ಸರಣಿ ಕಾರ್ಯಕ್ರಮದಲ್ಲಿ ‘ಸಾಂಝಿ ಕಲೆ’ಯ ಕಾರ್ಯಾಗಾರವು ದಿನಾಂಕ 25 ಜನವರಿ 2025ರಂದು ಉಡುಪಿಯ ಬಡಗುಪೇಟೆಯಲ್ಲಿ ಉದ್ಘಾಟನೆಗೊಂಡಿತು.
ಈ ಕಾರ್ಯಾಗಾರವನ್ನು ಕಲಾಶಿಕ್ಷಕರಾದ ರಾಘವೇಂದ್ರ ಅಮೀನ್ ಉದ್ಘಾಟಿಸಿ “ದೇಶೀಯ ಕಲೆಗಳು ಕೇವಲ ಸಾಮಾಜಿಕ ಜಾಲತಾಣಗಳಲ್ಲಿ ನೋಡಿ ಅನುಭವಿಸುವುದಕ್ಕಲ್ಲದೇ ಅದರ ತಾಂತ್ರಿಕತೆ, ಇತಿಹಾಸ ಇನ್ನಿತರ ವಿಷಯಗಳನ್ನು ಅದಕ್ಕೆ ಸಂಬಂಧಪಟ್ಟ ತಜ್ಞರಿಂದಲೇ ತಿಳಿದುಕೊಳ್ಳುವುದು ಬಹು ಮಹತ್ವದ್ದು. ಇದೊಂದು ಉಡುಪಿಯಂತಹ ಪುಟ್ಟ ಪಟ್ಟಣಕ್ಕೆ ರಾಷ್ಟ್ರಮಟ್ಟದಲ್ಲಿ ಮಾದರಿಯಾಗಬಹುದಾದ ಕಾರ್ಯಕ್ರಮ” ಎಂಬುದಾಗಿ ಅಭಿಪ್ರಾಯವಿತ್ತರು.
ಇನ್ನೋರ್ವ ಅತಿಥಿ ವಿದುಷಿ ಅಕ್ಷತಾ ವಿಶು ರಾವ್ “ಭಾವನಾ ಕಲಾ ಶಾಲೆಯ ವಿಂಶತಿಯ ಸಂಭ್ರಮದಲ್ಲಿ ರೂಪಿಸಲಾದ ಈ ಕಾರ್ಯಕ್ರಮದಲ್ಲಿ ಇಂದಿಗೆ ನಾಲ್ಕುನೂರಕ್ಕೂ ಮಿಕ್ಕಿ ಕಲಿಕಾಸಕ್ತರು ಭಾಗವಹಿಸಿ ಪರಿಣತರಿಂದ ದೇಶೀಯ ಕಲೆಗಳ ಬಗೆಗೆ ಉಡುಪಿಯಲ್ಲಿಯೇ ಕಲಿತಿರುವುದು ಸಂತಸದ ಸಂಗತಿ, ಇದು ಹೀಗೆಯೇ ಮುಂದುವರೆದು ದೇಶೀಯ ಕಲೆಗಳೆಲ್ಲ ಉಡುಪಿಯಲ್ಲಿ ಪಸರಿಸುವಂತಾಗಲಿ” ಎಂಬುದಾಗಿ ಹಾರೈಸಿದರು.
ಭಾವನಾ ಫೌಂಡೇಶನ್‌ನ ನಿರ್ದೇಶಕರಾದ ಹಾವಂಜೆ ಮಂಜುನಾಥ ರಾವ್ ಉಪಸ್ಥಿತರಿದ್ದರು. ಕಾರ್ಯಾಗಾರದ ಸಂಯೋಜಕರಾದ ಜನಾರ್ದನ ಹಾವಂಜೆ ಕಾರ್ಯಕ್ರಮ ನಿರ್ವಹಿಸಿದರು. ಈ ಸರಣಿ ಕಲಾ ಕಾರ್ಯಾಗಾರದ ಭಾಗವಾಗಿ ‘ಸಾಂಝಿ ಕಲೆ’ ಹಾಗೂ ನೀರಿನ ಮೇಲೆ ರಂಗೋಲಿಯನ್ನು ಹಾಕಿ ಕೃಷ್ಣನನ್ನು ಆರಾಧಿಸುವ ‘ಜಲ ಸಾಂಝಿ ಕಲೆ’ಯನ್ನು ಈ ಬಾರಿ ಪರಿಚಯಿಸುತ್ತಿದ್ದು, ಮಥುರಾದ ಶ್ರೀರಾಮ ಸೋನಿಯವರು ಈ ಕಾರ್ಯಾಗಾರವನ್ನು ನಡೆಸಿಕೊಟ್ಟರು.
