ಉಡುಪಿ : ಸಂಗೀತ ಸಭಾ ಹಾಗೂ ಆಭರಣ ಜುವೆಲರ್ಸ್ ಸಹಯೋಗದೊಂದಿಗೆ ದಿನಾಂಕ 08-10-2023ರ ಸಂಜೆ 4.30ರಿಂದ ಅಜ್ಜರಕಾಡು ಟೌನ್ ಹಾಲ್ ಸಭಾಂಗಣದಲ್ಲಿ ‘ಸಂಗೀತ ಸೌರಭ’, ಭಕ್ತಿ ಮತ್ತು ನಾಟ್ಯ ಸಂಗೀತ ಕಾರ್ಯಕ್ರಮವು ಜರಗಲಿದೆ.
1962ರಲ್ಲಿ ವಿಜಯನಾಥ್ ಶೆಣೈ ಅವರಿಂದ ಪ್ರಾರಂಭಿಸಲ್ಪಟ್ಟ ‘ಸಂಗೀತ ಸಭಾ’ ಹತ್ತು ಹಲವಾರು ಸ೦ಗೀತ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಾ ಬಂದಿದ್ದು ಜನಮನ್ನಣೆಗೆ ಪಾತ್ರವಾಗಿದೆ. ಸಂಗೀತ ಸೌರಭ-2023ರ ಸಂಗೀತ ಸಂಭ್ರಮದಲ್ಲಿ ಈಗಾಗಲೇ ಹಲವೆಡೆ ತಮ್ಮ ಗಾನ ಪಾಂಡಿತ್ಯದಿಂದ ಗಾನ ರಸಿಕರ ಮನಸೂರೆಗೊಂಡ, ಝೀ ಸರಿಗಮಪ ಲಿಟ್ಲ್ ಚಾಂಪ್ಸ್ ಖ್ಯಾತಿಯ ಜ್ಞಾನೇಶ್ವರಿ ಗಾಡಗೆ ಭಜನ ಮತ್ತು ನಾಟ್ಯ ಸಂಗೀತ ಪ್ರಸ್ತುತಪಡಿಸಲಿದ್ದಾರೆ.
ಹಾರ್ಮೋನಿಯಂನಲ್ಲಿ ಬಾಲ ಪ್ರತಿಭೆ, ಸಹೋದರಿ ಕಾರ್ತಿಕೀ ಗಾಡಗೆ ಜತೆಯಾಗಲಿದ್ದಾರೆ. ಸಹ ಕಲಾವಿದರಾದ ನಿತೇಶ್ ತೊಂಬ್ರೆ (ಪಕವಾಜ್), ವಿಶಾಲ್ ಪಾಟೀಲ್ (ತಬಲಾ) ಹಾಗೂ ಸೂರಜ್ ಪಾಟೀಲ್ (ಸೈಡ್ ರಿದಂ) ಪಾಲ್ಗೊಳ್ಳಲಿದ್ದಾರೆ. ಬಾಲಪ್ರತಿಭೆಗಳ ಪೋಷಕರಾದ ಗಣೇಶ್ ಗಾಡಗೆ, ರಾಧಾ ಗಾಡಗೆ ಕೋರಸ್ ಮೂಲಕ ಸಾಥ್ ನೀಡಲಿದ್ದಾರೆ. ಸಂಗೀತಾಸಕ್ತರಿಗೆ ‘ಪಾಸ್’ ಮುಖೇನ ಉಚಿತ ಪ್ರವೇಶ ಇದ್ದು, ಪಾಸ್‌ಗಳು ದಿನಾಂಕ 06-10-2023ರವರೆಗೆ ಉಡುಪಿಯ ಕವಿ ಮುದ್ದಣ ಮಾರ್ಗ ಮತ್ತು ಸಿಟಿ ಬಸ್ ನಿಲ್ದಾಣ ಸಮೀಪದಲ್ಲಿರುವ ಹರ್ಷ ಮಳಿಗೆಗಳಲ್ಲಿ ಲಭ್ಯವಿರುತ್ತದೆ. ಕಲಾಸಕ್ತರು ಕಾರ್ಯಕ್ರಮದಂದು ಸಂಜೆ 4.15ರ ಒಳಗೆ ಆಗಮಿಸಬೇಕು.
