ಮಂಗಳೂರು : ಕಾಸರಗೋಡಿನ ಸುಜೀವ ಪ್ರಕಾಶನ ಮತ್ತು ಮಂಗಳೂರಿನ ಸಾಹಿತ್ಯ ಕೇಂದ್ರ ಸಂಯುಕ್ತ ಆಶ್ರಯದಲ್ಲಿ ಪ್ರಸಿದ್ಧ ಜ್ಯೋತಿಷ್ಯ ಚಿಂತಕ ಲೇಖಕ ಶ್ರೀ ಸುಕುಮಾರ ಆಲಂಪಾಡಿಯವರ ‘ಜ್ಯೋತಿಷ್ಯಸಾರಕೋಶ’ ಕೃತಿಯ ಬಿಡುಗಡೆ ಸಮಾರಂಭವು ದಿನಾಂಕ 15-10-2023ರ ನಡೆದ ಸಂಜೆ ಘಂಟೆ 4.00ಕ್ಕೆ ಮಂಗಳೂರಿನ ಜಿ.ಹೆಚ್.ಎಸ್ ರಸ್ತೆ ಯಲ್ಲಿರುವ ಹೊಟೇಲ್ ಶ್ರೀನಿವಾಸ ಇದರ ಮಂಗಳಾ ಸಭಾಂಗಣದಲ್ಲಿ ನಡೆಯಿತು.
ಪ್ರಸಿದ್ಧ ವೈದಿಕ ಹಾಗೂ ಸಂಸ್ಕೃತ ವಿದ್ವಾಂಸರಾದ ಡಾ. ಸತ್ಯಕೃಷ್ಣ ಭಟ್ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿ “ಜ್ಯೋತಿಷ್ಯ ಶಾಸ್ತ್ರ ಸನತನ ಋಷಿಪರಂಪರೆಯಲ್ಲಿ ಬೆಳಗಿದ ಶಾಸ್ತ್ರ, ವೇದಗಳ ಕಾಲದಲ್ಲಿ ಕಾಲಗಣನೆಯನ್ನು ತಿಳಿಸುವ ವೇದಾಂಗ ಜ್ಯೋತಿಷ್ಯವು ಮುಂದೆ ಹಲವಾರು ಚಿಂತನೆಗಳನ್ನು ಒಳಗೊಂಡು ಆಧುನಿಕ ಸ್ವರೂಪವನ್ನು ಪಡೆಯಿತು. ಜ್ಯೋತಿಷ್ಯವನ್ನು ಕುರಿತು ಸಮಗ್ರ ದೃಷ್ಟಿಕೋನದಿಂದ ಕೂಡಿದ ಜ್ಯೋತಿಷ್ಯಸಾರ ಕೋಶವು ಒಂದು ಮಾದರಿ ಪಠ್ಯವಾಗಿದೆ. ಜ್ಯೋತಿಷ್ಯ ಶಾಸ್ತ್ರವನ್ನು ಕುರಿತು ಸುಕುಮಾರ ಆಲಂಪಾಡಿಯವರು ಕಳೆದ ಅನೇಕ ವರ್ಷಗಳಿಂದ ಮಡಿದ ಅಧ್ಯಯನ, ಆಲೋಚನೆಗಳು ಈ ಕೃತಿಯಲ್ಲಿ ಸಾಕಾರಗೊಂಡಿದೆ.” ಎಂದರು.
ಶುಭಾಶಂಸನೆ ನಡೆಸಿದ ಹಿರಿಯ ಜ್ಯೋತಿಷ್ಯ ಸಲಹೆಗಾರರೂ, ಶಾಸ್ತ್ರಚಿಂತಕರೂ ಆದ ಶ್ರೀ ತೆಕ್ಕುಂಜ ಜಯಶಂಕರ ಭಟ್ಟರು “ಈ ಕೃತಿಯು ಜಿಜ್ಞಾಸೆಗಳಿಗೆ ನಿಖರವಾದ ಅಪೂರ್ವ ಮಾಹಿತಿಗಳನ್ನೊಳಗೊಂಡ ಪರಾಮರ್ಶನ ಗ್ರಂಥವಾಗಿದೆ” ಎಂದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಮಂಗಳೂರಿನ ಹಿರಿಯ ವೈದಿಕ ವಿದ್ವಾಂಸರೂ, ಮಂಗಳೂರು ಪಂಡಿತ ಪಂಚಾಂಗದ ಪಂಚಾಂಗ ಕರ್ತೃಗಳೂ ಆದ ಪಂಡಿತ ನರಸಿಂಹ ಆಚಾರ್ಯರು ಮಾತನಾಡಿ “ಉತ್ತಮ ಶಾಸ್ತ್ರ ಚಿಂತನೆಯ ಈ ಕೃತಿ ಶರತ್ಕಾಲದ ಪರ್ವ ದಿನದಂದು ಬಿಡುಗಡೆ ಗೊಳಿಸುತ್ತಿರುವುದು ಸಂತಸ ತಂದಿದೆ. ಜ್ಞಾನ ಸಾಗರದಂತಿರುವ ಜ್ಯೋತಿಷ ಶಾಸ್ತ್ರವನ್ನು ಅಳವಾಗಿ ಅಭ್ಯಾಸಿಸಿ ಅದರ ಸಾರಸರ್ವತ್ವವನ್ನು ಜನಸಾಮಾನ್ಯರಿಗೂ ಅರ್ಥವಾಗುವ ರೀತಿಯಲ್ಲಿ ಸರಳ ಶೈಲಿಯಲ್ಲಿ ಈ ಕೃತಿಯನ್ನು ರಚಿಸಿರುವುದು ಸುಕುಮಾರರ ಅಪೂರ್ವ ಸಾಧನೆಯಾಗಿದೆ. ಇಂತಹ ಇನ್ನೂ ಅನೇಕ ಕೃತಿಗಳು ಅವರ ಲೇಖನಿಯಿಂದ ಮೂಡಿ ಬರಲಿ” ಎಂದು ಹಾರೈಸಿದರು. ಕೃತಿಯ ಲೇಖಕ ಸುಕುಮಾರ ಆಲಂಪಾಡಿಯವರು ಸಂದರ್ಭೋಚಿತವಾಗಿ ಮಾತನಾಡಿದರು.
ಡಾ. ವರ್ಣಾ ಮತ್ತು ಡಾ.ಇಂಚರ ಅವರ ಪ್ರಾರ್ಥನೆಯೊಂದಿಗೆ ಆರಂಭಗೊಂಡ ಕಾರ್ಯಕ್ರಮದ ಮೊದಲಿಗೆ ಪುತ್ತೂರಿನ ವಿವೇಕಾನಂದ ಬಿ.ಎಡ್ ಕಾಲೇಜಿನ ಪ್ರಾಂಶುಪಾಲೆ ಶ್ರೀಮತಿ ಶೋಭಿತಾ ಸತೀಶ್ ಅವರು ಸ್ವಾಗತಿಸಿ, ಮಂಗಳೂರಿನ ಸಾಹಿತ್ಯ ಕೆಂದ್ರದ ರತ್ನಾಕರ ಕುಳಾಯಿ ಅವರು ವಂದಿಸಿ, ಶಾರದಾ ಪದವಿ ಪೂರ್ವ ಕಾಲೇಜಿನ ಸಂಸ್ಕೃತ ಉಪನ್ಯಾಸಕ ಶ್ರೀ ರಮೇಶ್ ಆಚಾರ್ಯ ನಾರಳ ಕಾರ್ಯಕ್ರಮ ನಿರ್ವಹಿಸಿದರು.
