ಮಂಗಳೂರು : ಜರ್ನಿ ಥೇಟರ್ ಮಂಗಳೂರು ಹಾಗೂ ಮಾಂಡ್ ಸೊಭಾಣ್ ಇದರ ಸಹಯೋಗದಲ್ಲಿ ಆಯೋಜಿಸಿದ ಮೂರು ದಿನಗಳ ಬೆಳಕಿನ ವಿನ್ಯಾಸ ಕರ‍್ಯಾಗಾರ `ಕ್ರಾಸ್ ಫೇಡ್’ ಇದರ ಸಮಾರೋಪ ಸಮಾರಂಭ ದಿನಾಂಕ 27-06-2024ರಂದು ಮಂಗಳೂರಿನ ಶಕ್ತಿನಗರದ ಕಾಲಾಂಗಣ್ ನಲ್ಲಿ ನಡೆಯಿತು.
ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ಖ್ಯಾತ ತುಳು ರಂಗ ಹಾಗೂ ಸಿನೆಮಾ ನಿರ್ದೇಶಕ ಮತ್ತು ನಟರಾದ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಶಿಬಿರಾರ್ಥಿಗಳಿಗೆ ಪ್ರಮಾಣ ಪತ್ರ ವಿತರಿಸಿ ಮಾತನಾಡಿ “ಒಂಬತ್ತು ಗಂಟೆಗೆ ನಾಟಕವಾದರೆ ನಮಗೆ ವೇದಿಕೆ ದೊರೆಯುತ್ತಿದ್ದುದು ಎಂಟು ಮುಕ್ಕಾಲಿಗೆ. ಬೇಗ ಶುರು ಮಾಡಿ ಎಂಬ ಒತ್ತಾಯ ಬೇರೆ. ಆಗ ಬೆಳಕಿನ ವಿನ್ಯಾಸದ ಬಗ್ಗೆ ಚಿಂತಿಸಲು ಪುರುಸೊತ್ತಾದರೂ ಎಲ್ಲಿ? ನಮಗೆ ಗೊತ್ತಿದ್ದದ್ದು ಎರಡೇ ಲೈಟು. ಕೋಪ ಬಂದರೆ ಕೆಂಪು, ಮತ್ತೊಂದು ನೀಲಿ. ಏಕೆಂದರೆ ನಮ್ಮ ಕಾಲದ ತುಳು ಕಲಾವಿದರಿಗೆ ಇಂತಹ ರಂಗ ಶಿಕ್ಷಣ ದೊರೆತಿರಲಿಲ್ಲ. ನಾವು ಮೂರು ಗಂಟೆ ಪ್ರೇಕ್ಷಕರನ್ನು ನಗಿಸುವ ಬಗ್ಗೆ, ನೂರಾರು ಪ್ರದರ್ಶನ ಮಾಡುವ ಬಗ್ಗೆ ಹಾಗೂ ಅದರಿಂದ ನಮ್ಮ ಹೊಟ್ಟೆ ಹೊರೆಯುವ ಬಗ್ಗೆ ಮಾತ್ರ ಯೋಚಿಸಿದ್ದು. ನೀವು ಅದೃಷ್ಟವಂತರು. ನಿಮಗೆ ದೊರೆತ ಈ ಅಧ್ಯಯನದ ಶಿಸ್ತನ್ನು ಬಳಸಿಕೊಂಡು ರಂಗಭೂಮಿಯನ್ನು ಅಭಿವೃದ್ಧಿ ಮಾಡುವ ಜವಾಬ್ದಾರಿ ಉತ್ಸಾಹವಿರಲಿ, ಕಲಿಕೆ ನಿರಂತರವಾಗಿರಲಿ’’ ಎಂದು ಹಾರೈಸಿದರು.
ಇನ್ನೋರ್ವ ಅತಿಥಿ ಮಾಂಡ್ ಸೊಭಾಣ್ ಗುರಿಕಾರ ಎರಿಕ್ ಒಝೇರಿಯೊ ಮಾತನಾಡಿ ‘’ಕಲಾಂಗಣವನ್ನು ಕಟ್ಟಿದ್ದೇ ಇಂತಹ ರಂಗಭೂಮಿ ಚಟುವಟಿಕೆಗಳಿಗಾಗಿ. ಇಲ್ಲಿ ಕಲಾವಿದರು ಜಾತಿ ಮತ ರಹಿತರಾಗಿ ಸೇರಿ ಕಲಿಯಬೇಕು, ಕಲಿಸಬೇಕು, ರಂಗಭೂಮಿ ಬೆಳೆಯಬೇಕು ಎಂಬ ಉದ್ದೇಶವಿತ್ತು. ರಂಗಭೂಮಿಯಲ್ಲಿ ಬೆಳಕಿನ ವಿನ್ಯಾಸದ ಬಗ್ಗೆ ಚಿಂತಿಸಿದವರು ಕಮ್ಮಿ. ಇದೊಂದು ಬಹು ಅಗತ್ಯವಾಗಿದ್ದ ಕರ‍್ಯಾಗಾರ.’’ ಎಂದು ಅಭಿಪ್ರಾಯಪಟ್ಟರು. ರಂಗಭೂಮಿಯಲ್ಲಿ ಬೆಳಕಿನ ವಿನ್ಯಾಸದ ಚರಿತ್ರೆ, ಸಹಜ ಬೆಳಕು, ಬೇರೆ ಬೇರೆ ಕೋನಗಳು, ಬಣ್ಣಗಳು, ಭಾವನೆಗಳು, ವಿವಿಧ ಪರಿಕರಗಳು ಹಾಗೂ ಸಂಪ್ರದಾಯಿಕತೆಯಿಂದ ಆಧುನಿಕತೆ ಬೆಳೆದ ಬಗೆ ಹೀಗೆ ಮೂರು ದಿನ ಕಾರ್ಯಾಗಾರ ನಡೆದ ರೀತಿಯನ್ನು ಜರ್ನಿ ಥೇಟರಿನ ವಿದ್ದು ಉಚ್ಚಿಲ್ ಸಿಂಹಾವಲೋಕನ ಮಾದರಿಯಲ್ಲಿ ಪ್ರಸ್ತಾವಿಸಿದರು.
ಸಂಪನ್ಮೂಲ ವ್ಯಕ್ತಿಗಳಾದ ಕೃಷ್ಣಕುಮಾರ್ ನಾರ್ಣಕಜೆ ರಂಗಾಯಣ, ಮಧೂಸೂಧನ್ ನೀನಾಸಂ ಹಾಗೂ ಶಿಬಿರಾರ್ಥಿ ಪೈಕಿ ಮೇಧಾ ವಿ. ಎಂ. ಮತ್ತು ಸದಾಶಿವ ಕಾಸರಗೋಡು ತಮ್ಮ ಅನುಭವ ಹಂಚಿಕೊಂಡರು. ಸುನೀಲ್ ಪಲ್ಲಮಜಲು ಸ್ವಾಗತಿಸಿ, ಕಾರ್ಯಕ್ರಮ ನಿರೂಪಿಸಿ, ವಂದಿಸಿದರು. ಸುಧೀಶ್, ವಿಕಾಸ್ ಕಲಾಕುಲ್ ಹಾಗೂ ಇತರರು ಸಹಕರಿಸಿದರು.
25-06-2024 ರಿಂದ 27-06-2024ರವರೆಗೆ ನಡೆದ ಈ ಕಾರ್ಯಾಗಾರದ ಉದ್ಘಾಟನೆಯನ್ನು ಕಿಂಗ್ಸ್ ಲೀ ನಜ್ರೆತ್ ಇವರು ನೆರವೇರಿಸಿದ್ದರು. ಈ ಕಾರ್ಯಾಗಾರದಲ್ಲಿ ಬೆಳಕು ವಿನ್ಯಾಸಗಾರರ ಸಮಸ್ಯೆಗಳು ಮತ್ತು ಅವುಗಳಿಗೆ ಪರಿಹಾರಗಳ ಬಗ್ಗೆ ಚರ್ಚಿಸಲಾಯಿತು. ಕಾಸರಗೋಡು, ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡದ ಸುಮಾರು 30ಕ್ಕೂ ಮಿಕ್ಕಿ ಶಿಬಿರಾರ್ಥಿಗಳು ಭಾಗವಹಿಸಿದ್ದರು.
