ಮೈಸೂರು : ಧ್ವನಿ ಫೌಂಡೇಷನ್ ಇದರ ವತಿಯಿಂದ ‘ಸ್ವರ ಕುಟೀರ’ ಸಂಗೀತ ನೃತ್ಯ ಸಭಾಂಗಣದ ಉದ್ಘಾಟನಾ ಸಮಾರಂಭವನ್ನು ದಿನಾಂಕ 22 ಸೆಪ್ಟೆಂಬರ್ 2024ರಂದು ಸಂಜೆ 5-30 ಗಂಟೆಗೆ ಮೈಸೂರಿನ ದಟ್ಟಗಳ್ಳಿ, ಸೋಮನಾಥ ನಗರದಲ್ಲಿ ಆಯೋಜಿಸಲಾಗಿದೆ.
ಮೈಸೂರಿನ ಹಿಂದೂಸ್ತಾನಿ ಗಾಯಕರಾದ ಶ್ರೀಮತಿ ಶಾರದಾ ಭಟ್ ಕಟ್ಟಿಗೆ ಇವರ ಉಪಸ್ಥಿತಿಯಲ್ಲಿ ಈ ಕಾರ್ಯಕ್ರಮವನ್ನು ಸನ್ಮಾನ್ಯ ಸಚಿವರಾದ ಡಾ. ಎಚ್.ಸಿ. ಮಹದೇವಪ್ಪ ಇವರು ಉದ್ಘಾಟಿಸಲಿದ್ದು, ಚಲನಚಿತ್ರ ನಟರಾದ ಶ್ರೀ ಬಿ. ಸುರೇಶ್ ಇವರು ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ವಿಶೇಷ ಆಹ್ವಾನಿತರಾದ ಖ್ಯಾತ ಹಿಂದೂಸ್ತಾನಿ ಗಾಯಕರಾದ ಉಸ್ತಾದ್ ಫಯಾಜ್ ಖಾನ್ ಇವರಿಂದ ಗಾಯನ ಪ್ರಸ್ತುತಿ ನಡೆಯಲಿದೆ.
ಮಂಗಳೂರಿನ ಸಂದೇಶ ಲಲಿತ ಕಲಾ ಮಹಾವಿದ್ಯಾಲಯದಲ್ಲಿ ನಾನು ಪದವಿ ಓದಿದ್ದು, ಅಲ್ಲಿ ಭರತನಾಟ್ಯಮ್ ನನ್ನ ಪದವಿ ಅಧ್ಯಯನದ ಒಂದು ವಿಷಯವಾಗಿತ್ತು. ಸಂದೇಶದ ತರಗತಿ ಕೋಣೆಗಳಿಂದ ಏಕಕಾಲದಲ್ಲಿ ಸಂಗೀತದ ನಾದ, ನೃತ್ಯದ ಹೆಜ್ಜೆಯ ಸದ್ದು, ತಬಲದ ಲಯ, ವಯಲಿನ್ ನ ನಿನಾದ ಕೇಳುವಾಗ ಗಂಧರ್ವ ಲೋಕವೊಂದರಲ್ಲಿ ವಿಹರಿಸುವ ಹಾಗಿನ ಅನುಭೂತಿಯೊಂದು ನನ್ನೊಳಗೆ ಮೂಡುತ್ತಿತ್ತು. ನಿರಂತರ ಮೂರು ವರುಷಗಳ ಕಾಲ ಅಕ್ಷರಶ: ಈ ಲೋಕದಲ್ಲಿ ಬದುಕಿದ್ದವಳು ನಾನು. ಅಲ್ಲಿ ನನ್ನೊಳಗೆ ಮೊಳಕೆಯೊಡೆದ ಕನಸುಗಳು ಧ್ವನಿ ಫೌಂಡೇಷನ್ ನ ಮೂಲಕ ನನಸಾಗ ಹೊರಟಿದೆ. ಧ್ವನಿಗಾಗಿ ಇದೀಗ ನಿರ್ಮಾಣಗೊಂಡ ಪುಟ್ಟ ಅವರಣವೇ ‘ಸ್ವರ ಕುಟೀರ’. ಇದು ದಿನಾಂಕ 22 ಸೆಪ್ಟೆಂಬರ್ 2024ರಂದು ಲೋಕಾರ್ಪಣೆಗೊಳ್ಳುವ ಹೊತ್ತಿಗೆ ನೀವು ಸಾಕ್ಷಿಯಾಗಬೇಕೆಂಬುದು ನಿಮ್ಮಲ್ಲಿ ನನ್ನ ಕೋರಿಕೆ.
ಡಾ. ಶ್ವೇತಾ ಮಡಪ್ಪಾಡಿ
