ಮಂಗಳೂರು : ಹಿರಿಯ ರಂಗ ನಿರ್ದೇಶಕ ಮೋಹನಚಂದ್ರ ಯು. ಇವರು ರಚಿಸಿದ ನಾಟಕ ಕೃತಿ ‘ಕನಕ-ಪುರಂದರ’ ಇದರ ಲೋಕಾರ್ಪಣಾ ಸಮಾರಂಭವು ದಿನಾಂಕ 07 ನವೆಂಬರ್ 2024ರಂದು ಸಂತ ಅಲೋಶಿಯಸ್ ಪರಿಗಣಿತ ವಿಶ್ವವಿದ್ಯಾನಿಲಯದ ಸಾನ್ನಿಧ್ಯ ಸಭಾಂಗಣದಲ್ಲಿ ನಡೆಯಿತು.
ಸಂತ ಅಲೋಶಿಯಸ್ ಪರಿಗಣಿತ ವಿಶ್ವವಿದ್ಯಾನಿಲಯ, ಆಯನ ನಾಟಕದ ಮನೆ, ಮಂಗಳೂರು ಮತ್ತು ಹೊಸಪೇಟೆಯ ಯಾಜಿ ಪ್ರಕಾಶನದ ಸಹಯೋಗದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಕವಿ, ಕಥೆಗಾರ ಹಾಗೂ ಕಾಕಲ್ ಪೌಂಡೇಶನ್ ಇದರ ಟ್ರಸ್ಟಿಚಂದ್ರಶೇಖರ್ ಕಾಕಲ್ ಕೃತಿಯನ್ನು ಲೋಕಾರ್ಪಣೆ ಮಾಡಿದರು. ಸಂತ ಅಲೋಶಿಯಸ್ ಸ್ವಾಯತ್ತ ಕಾಲೇಜಿನ ಕುಲಸಚಿವ ಡಾ. ಆಲ್ವಿನ್ ಡೇಸಾ ಸಮಾರಂಭದ ಅಧ್ಯಕ್ಷತೆಯನ್ನು ವಹಿಸಿದ್ದರು. ರಂಗನಟ ಮತ್ತು ರಂಗ ನಿರ್ದೇಶಕ ಡಾ. ನರಸಿಂಹಮೂರ್ತಿ ಮತ್ತು ಬ್ಯಾರಿ ಸಾಹಿತ್ಯ ಅಕಾಡೆಮಿಯ ಮಾಜಿ ಸದಸ್ಯ ಸಂಶುದ್ದೀನ್ ಇವರು ರಂಗಪಠ್ಯದ ಪರಿಚಯ ಮಾಡಿದರು. ರಂಗ ಸಂಗೀತ ಸಂಯೋಜಕ ಶೀನಾ ನಾಡೋಳಿ ‘ಕನಕ-ಪುರಂದರ’ ರಂಗಪಠ್ಯದಲ್ಲಿ ಬರುವ ಕನಕ-ಪುರಂದರರ ಕೀರ್ತನೆಗಳಿಗೆ ರಾಗ ಸಂಯೋಜಿಸಿ ಹಾಡಿದರು.
ಯಾಜಿ ಪ್ರಕಾಶನದ ಆಡಳಿತ ನಿರ್ದೇಶಕಿ ಸವಿತಾ ಯಾಜಿ, ಕಾರ್ಯನಿರ್ವಾಹಕ ನಿರ್ದೇಶಕ ಗಣೇಶ ಯಾಜಿ, ಹಿರಿಯ ರಂಗ ತಜ್ಞ ಐ. ಕೆ. ಬೊಳುವಾರು, ಆಯನ ನಾಟಕದ ಮನೆಯ ಸಂಸ್ಥಾಪಕ ಸದಸ್ಯ ಶ್ಯಾಮಸುಂದರ್ ರಾವ್, ಪ್ರಭಾಕರ್ ಕಾಪಿಕಾಡ್, ನಟ ಚಂದ್ರಹಾಸ್ ಉಳ್ಳಾಲ ಪಾಲ್ಗೊಂಡಿದ್ದರು. ಸಂತ ಅಲೋಶಿಯಸ್ ಪರಿಗಣಿತ ವಿ. ವಿ. ಇದರ ಡಾ. ದಿನೇಶ್ ನಾಯಕ್ ಕಾರ್ಯಕ್ರಮದಲ್ಲಿ ಸ್ವಾಗತಿಸಿ ಹಾಗೂ ನಿರೂಪಿಸಿ, ಕೃತಿಕಾರ ಮೋಹನಚಂದ್ರ ಯು. ವಂದಿಸಿದರು.
