ಸಾಗರದ ಪವಿತ್ರಾ ಸಭಾಂಗಣದಲ್ಲಿ ಪರಸ್ಪರ ಸಾಹಿತ್ಯ ವೇದಿಕೆಯ ವಾರ್ಷಿಕ ಪ್ರಶಸ್ತಿ ಪ್ರದಾನ ಸಮಾರಂಭ.

ಸಾಗರ : ಸಾಗರದ ಪರಸ್ಪರ ಸಾಹಿತ್ಯ ವೇದಿಕೆ ಆಯೋಜಿಸಿದ್ದ ವಾರ್ಷಿಕ ಪ್ರಶಸ್ತಿ ಪ್ರದಾನ ಸಮಾರಂಭವು ದಿನಾಂಕ 26 ಜನವರಿ 2025ರ ಭಾನುವಾರದಂದು ಸಾಗರದ ಬಿ. ಹೆಚ್. ರಸ್ತೆಯಲ್ಲಿರುವ ಪವಿತ್ರಾ ಸಭಾಂಗಣದಲ್ಲಿ ನಡೆಯಿತು.

ಕಾರ್ಯಕ್ರಮದಲ್ಲಿ ರೆವರೆಂಡ್ ಎಫ್. ಕಿಟೆಲ್ ಪ್ರಶಸ್ತಿ ಸ್ವೀಕರಿಸಿದ ಚಿಂತಕ ಪ್ರೊ. ಎಸ್. ಜಿ. ಸಿದ್ದರಾಮಯ್ಯ ಮಾತನಾಡಿ “ಕಿಟೆಲ್ ಅವರನ್ನು ಕ್ರೈಸ್ತ ಧರ್ಮಿಯನ್ನಾಗಿ ನೋಡದಿರಿ, ಅವರೊಬ್ಬ ಮಾನವತಾವಾದಿ. ಕನ್ನಡಕ್ಕೆ ಅವರು ನೀಡಿದ ನಿಘಂಟು ಸಾರ್ವಕಾಲಿಕ ಬಹುದೊಡ್ಡ ಕೊಡುಗೆ. ಕಿಟೆಲ್ ಅವರು ನಡೆದಾಡುವ ವಿಶ್ವಕೋಶದಂತಿದ್ದರು. ತಂತ್ರಜ್ಞಾನ ಇಲ್ಲದ ಸಂದರ್ಭದಲ್ಲಿ 70 ಸಾವಿರ ಕನ್ನಡ ಪದಗಳಿಗೆ ನಿಘಂಟಿನ ಮೂಲಕ ಅರ್ಥ ನೀಡುವ ಮಹಾನ್ ಕೆಲಸ ಮಾಡಿದ್ದಾರೆ. ಕನ್ನಡದ ಮೇಲೆ ಕಿಟೆಲ್ ಅವರಿಗಿದ್ದ ಶ್ರದ್ದೆ ಹಾಗೂ ಅವರು ಪ್ರಕಟಿಸಿದ ಸಂಶೋಧನಾ ಗ್ರಂಥಗಳು ಅಪರೂಪದವು. 1875ರಲ್ಲಿ ಲಿಂಗಾಯತ ಧರ್ಮದ ಮೇಲೂ ಕೂಡ ಕರಾರುವಕ್ಕಾದ ಲೇಖನಗಳನ್ನು ಅವರು ಕಟ್ಟಿಕೊಟ್ಟಿದ್ದಾರೆ. ಕಿಟೆಲ್ ಅವರು ಕನ್ನಡಕ್ಕೆ ಕೊಟ್ಟ ಕೊಡುಗೆ ಅಪಾರ” ಎಂದರು.

ಸಂತ ಶಿಶುನಾಳ ಶರೀಫ ಪ್ರಶಸ್ತಿ ಸ್ವೀಕರಿಸಿದ ತುಮಕೂರಿನ ಡಾ. ಮಿರ್ಜಾ ಬಷೀರ್ ಮಾತನಾಡಿ “ನಾನು ಬರೆದ ಕಥೆಗಳಲ್ಲಿ ಬಹುತೇಕ ವಿಷಯಗಳು ಕೋಮು ಸೌಹಾರ್ದದ ಮೆಲೆ ಕಟ್ಟಿಕೊಡಲಾಗಿದೆ” ಎಂದು ತಿಳಿಸಿದರು. ಹಿರಿಯ ಸಾಹಿತಿ ಡಾ. ಜಿ. ಎಸ್. ಭಟ್ ಮಾತನಾಡಿ “ಇತ್ತೀಚಿನ ದಿನಗಳಲ್ಲಿ ಸರ್ಕಾರ ನೀಡುವ ಪ್ರಶಸ್ತಿಗಳ ಬಗ್ಗೆ ಜನರು ವಿಶ್ವಾಸ ಕಳೆದುಕೊಳ್ಳುತ್ತಿದ್ದಾರೆ” ಎಂದರು.

ಪರಸ್ಪರ ಸಾಹಿತ್ಯ ವೇದಿಕೆಯ ಅಧ್ಯಕ್ಷರಾದ ಡಾ. ಸರ್ಫರಾಜ್ ಚಂದ್ರಗುತ್ತಿ ಮಾತನಾಡಿ “ವೇದಿಕೆ 21 ವರ್ಷಗಳಿಂದ ಕನ್ನಡ ಸಾಹಿತ್ಯ ಕಟ್ಟುವ ಮತ್ತು ಹೊಸ ತಲೆಮಾರಿಗೆ ಸಾಹಿತ್ಯ ಓದುವ ಆಸಕ್ತಿ ಮೂಡಿಸುವ ಕೆಲಸವನ್ನು ಮಾಡಿಕೊಂಡು ಬರುತ್ತಿದೆ. 2019ರಿಂದ ಪ್ರತಿ ವರ್ಷ ಸಂತ ಶಿಶುನಾಳ ಶರೀಫ, ಅಕ್ಕಮಹಾದೇವಿ ಮತ್ತು ರೆವರೆಂಡ್ ಎಫ್. ಕಿಟೆಲ್ ಪ್ರಶಸ್ತಿ ನೀಡುತ್ತಿದ್ದೇವೆ. ಈ ಪ್ರಶಸ್ತಿಯು ರೂಪಾಯಿ 10,000 ನಗದು ಒಳಗೊಂಡಿದೆ” ಎಂದು ಹೇಳಿದರು.ಇದೇ ಸಂದರ್ಭದಲ್ಲಿ ಕನ್ನಡ ಪರೀಕ್ಷೆಯಲ್ಲಿ ಹೆಚ್ಚು ಅಂಕ ಪಡೆದ ವಿದ್ಯಾರ್ಥಿಗಳನ್ನು ಅಭಿನಂದಿಸಲಾಯಿತು. ಹರೀಶ್ ಕೊಡಸೆ, ವೀರಪ್ಪ ಭದ್ರಾಪುರ, ಪಿ.ಶಿವರಾಮ್, ಆರ್. ಜಯಾನಾಯಕ, ಡಾ. ಕೆ. ಎಸ್. ದೇವೆಂದ್ರಪ್ಪ, ವಿಶ್ವನಾಥ ಬರೂರ್, ರಿಯಾ ಆಯಿಶಾ ಉಪಸ್ಥಿತರಿದ್ದರು.