ಏರ್ಯ ಬೀಡಿನಲ್ಲಿ “ಏರ್ಯ ಸಾಹಿತ್ಯ ಸಂಭ್ರಮ”

05 ಏಪ್ರಿಲ್ 2023, ಬಂಟ್ವಾಳ: ಹಂಪಿ ಕನ್ನಡ ವಿವಿಯ ನಿವೃತ್ತ ಕುಲಪತಿ ಡಾ. ಬಿ.ಎ.ವಿವೇಕ ರೈ ಅವರು ದಿನಾಂಕ 02-04-2023ರಂದು ರವಿವಾರ ಬಿ.ಸಿ.ರೋಡು ಬಳಿಯ ಏರ್ಯ ಬೀಡಿನಲ್ಲಿ ಏರ್ಯ ಆಳ್ವ ಫೌಂಡೇಶನ್ ಆಶ್ರಯದಲ್ಲಿ ಡಾ. ಏರ್ಯ ಲಕ್ಷ್ಮೀನಾರಾಯಣ ಆಳ್ವ ಅವರ ಕೃತಿಗಳಲ್ಲಿ ಮುಖ್ಯವಾದವುಗಳನ್ನು ಮಥಿಸುವ ಮತ್ತು ಏರ್ಯರ ಕವನಗಳನ್ನು ಹಾಡುವ “ಏರ್ಯ ಸಾಹಿತ್ಯ ಸಂಭ್ರಮ”ವನ್ನು ಉದ್ಘಾಟಿಸಿ, “ಜನಪದ, ಸಾಹಿತ್ಯ, ಸಂಘಟನೆ ಹೀಗೆ ಸರ್ವ ಕ್ಷೇತ್ರದಲ್ಲೂ ತೊಡಗಿಕೊಂಡ ಸಾಹಿತಿ ಏರ್ಯ ಅವರು ಮಾನವತಾವಾದದ ಇಡೀ ರೂಪವಾಗಿದ್ದು, ಸಾಹಿತ್ಯ ಕೃಷಿಯನ್ನು ತನ್ನ ಬದುಕಿನ ಜೀವಧಾತುವಾಗಿ ಬಳಸಿಕೊಂಡಿದ್ದರು. ಮುಂದಿನ ಮೂರು ವರ್ಷಗಳಲ್ಲಿ ಅವರ ಜನ್ಮ ಶತಮಾನೋತ್ಸವ ಆಚರಿಸುವ ಸುಸಂದರ್ಭವಿದ್ದು, ಆ ವೇಳೆ ಏರ್ಯರ ಸಮಗ್ರ ಸಾಹಿತ್ಯ ಸಂಪುಟವನ್ನು ಹೊರತರುವ ಕೆಲಸವಾಗಬೇಕು” ಎಂದು ಹೇಳಿದರು.

ಭೋಜನ ಪೂರ್ವದಲ್ಲಿ ಹಿರಿಯರಾದ ಡಾ. ತಾಳ್ತಜೆ ವಸಂತ ಕುಮಾರ್ ಇವರಿಂದ ಕೃತಿ “ಸ್ನೇಹ ತಂತು”, “ರಾಮಶ್ವಮೇಧದ ರಸತರಂಗಗಳು” ಕೃತಿ ಡಾ. ನಾ. ದಾಮೋದರ ಶೆಟ್ಟಿಯವರಿಂದ, “ಮುಳಿಯ ತಿಮ್ಮಪ್ಪಯ್ಯ ಹಾಗೂ ಪಾತ್ರಗಳು ಚಿತ್ರಿಸಿದ ಸೇಡಿಯಾಪು” ಕೃತಿಯನ್ನು ಪ್ರೊ. ಪಿ. ಕೃಷ್ಣಮೂರ್ತಿ, “ಮೊದಲ ಮಳೆ” ಕೃತಿಯು ಡಾ. ಯು. ಮಹೇಶ್ವರಿ ಇವರಿಂದ ಕೃತಿ ವಿಶ್ಲೇಷಣೆ ನಡೆಯಿತು.

ಅಪರಾಹ್ನ ಮತ್ತೆ ನಾಲ್ಕು ಕೃತಿಗಳ ವಿಶ್ಲೇಷಣೆ ನಡೆಯಿತು. ಕೃತಿ “ಹಿಂದಣ ಹೆಜ್ಜೆ” ಡಾ. ತುಕಾರಾಂ ಪೂಜಾರಿ, “ಸಂಚಯ” ಕೃತಿಯ ವಿಶ್ಲೇಷಣೆ ಡಾ. ಸತ್ಯನಾರಾಯಣ ಮಲ್ಲಿಪಟ್ಟಣ, “ನೂರರ ನೆನಪು” ಕೃತಿಯನ್ನು ಡಾ. ಆರ್. ನರಸಿಂಹಮೂರ್ತಿ ಮತ್ತು “ಮಂಗಳ ತಿಮರು” ಕೃತಿಯನ್ನು ಡಾ. ಅರುಣಕುಮಾ‌ರ್ ಎಸ್.ಆರ್. ವಿಶ್ಲೇಷಿಸಿದರು. ಈ ಕೃತಿ ವಿಶ್ಲೇಷಣಾ ಕಾರ್ಯಕ್ರಮದ ಮಧ್ಯೆ ಕಿಶೋರ್ ಪೆರ್ಲ ಇವರ ಕಂಠ ಸಿರಿಯಿಂದ ಹೊಮ್ಮಿದ ಗಾಯನ ಕಾರ್ಯಕ್ರಮದಲ್ಲಿ ಪಾಲ್ಗೊಂಡವರನ್ನು ರಂಜಿಸಿತು.

ಏರ್ಯರ ಪತ್ನಿ ಆನಂದಿ ಆಳ್ವ ಅವರು ಡಾ. ವಿವೇಕ ರೈ ಅವರನ್ನು ಗೌರವಿಸಿದರು. ಏರ್ಯರ ಪುತ್ರಿ ಸುಖದ ಬಾಲಕೃಷ್ಣ ಹೆಗ್ಡೆ ಮತ್ತು ಮೊಮ್ಮಗಳು ಭಕ್ತಿ ಹೆಗ್ಡೆ ಮೊದಲಾದವರು ಉಪಸ್ಥಿತರಿದ್ದರು. ಅಳಿಯ ಬಾಲಕೃಷ್ಣ ಹೆಗ್ಡೆ ಸ್ವಾಗತಿಸಿದರು. ನಿವೃತ್ತ ಪ್ರಾಧ್ಯಾಪಕ ಮಹಾಬಲೇಶ್ವರ ಹೆಬ್ಬಾರ್ ಹಾಗೂ ಕೇಶವ ಎಚ್. ಕಾರ್ಯಕ್ರಮ ನಿರ್ವಹಿಸಿದರು.