ಜರ್ಮನಿ : ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಇದರ ಯೂರೋಪ್ ಘಟಕವು ದಿನಾಂಕ 10 ಮೇ 2025ರಂದು ಜರ್ಮನಿಯ ಅಲ್ಸ್ಬಾಕ್‌ನಲ್ಲಿ ‘ಭಾರತ್ ಕಲಾ ವೈಭವ’ ಸಾಂಸ್ಕೃತಿಕ ಉತ್ಸವವನ್ನು ಯಶಸ್ವಿಯಾಗಿ ಆಯೋಜಿಸಿತು. ಭಾರತೀಯ ಕಲೆಗಳಿಗೆ ಯೂರೋಪ್‌ನಲ್ಲಿ ವೈಭವಮಯ ವೇದಿಕೆ ನೀಡಿದ ಈ ಸಾಂಸ್ಕೃತಿಕ ಉತ್ಸವವು ನಮ್ಮ ಫೌಂಡೇಶನ್ನಿನ ಹೆಮ್ಮೆಗುರಿಯಾಗಿದ್ದು, ಇದು ಭಾರತದ ಕಲೆಗಳು ಮತ್ತು ಸಂಸ್ಕೃತಿಯ ವೈವಿಧ್ಯತೆಯನ್ನು ಯೂರೋಪಿನ ಮನಸ್ಸಿನಲ್ಲಿ ಉಳಿಸುವ ಪ್ರಯತ್ನವಾಗಿತ್ತು.
ಈ ಕಾರ್ಯಕ್ರಮದಲ್ಲಿ ಯುರೋಪ್‌ನ ವಿವಿಧ ಭಾಗಗಳಿಂದ 60ಕ್ಕೂ ಹೆಚ್ಚು ಕಲಾವಿದರು ಪಾಲ್ಗೊಂಡು, 350ಕ್ಕೂ ಹೆಚ್ಚು ಪ್ರೇಕ್ಷಕರಿಗೆ – ಭಾರತೀಯರು ಮತ್ತು ಸ್ಥಳೀಯರು – ಭಾರತೀಯ ಸಂಸ್ಕೃತಿಯ ವಿಶಿಷ್ಟತೆಯನ್ನು ಪ್ರಸ್ತುತಪಡಿಸಿದರು. ಅಲ್ಸ್ಬಾಕ್‌ ಮೇಯರ್ ಶ್ರೀ ಸೆಬಾಸ್ಟಿಯನ್ ಬುಬೆನ್ಜರ್ ನಮ್ಮ ಈ ಪ್ರಯತ್ನಕ್ಕೆ ಪ್ರಸ್ತುತತೆಯನ್ನು ನೀಡಿದ್ದು, ಫೌಂಡೇಶನ್‌ನ ಕಾರ್ಯಚಟುವಟಿಕೆಗಳನ್ನು ಮನೋಜ್ಞವಾಗಿ ಪ್ರಶಂಸಿಸಿದರು.
ತಮಿಳುನಾಡಿನ ಕಾವಡಿ ಅಟ್ಟಂ, ರಾಜಸ್ಥಾನದ ಘೂಮರ್, ಕೇರಳದ ಮೋಹಿನಿಯಟ್ಟಂ, ಅಸ್ಸಾಂನ ಸತ್ರಿಯಾ ಮತ್ತು ಕರ್ನಾಟಕದ ಕೋಲಾಟ ಮೊದಲಾದ ನೃತ್ಯ ಪ್ರಕಾರಗಳು. ಯಕ್ಷಗಾನ ಬ್ಯಾಲೆ – ‘ಮಾಯಾಮೃಗ’ ವಿಶೇಷವಾಗಿ ಮಕ್ಕಳಿಂದ ಪ್ರಸ್ತುತವಾಗಿದ್ದು, ಕಲಾತ್ಮಕ ಪರಂಪರೆಯ ಮುಂದುವರಿಯುವ ಭರವಸೆಯನ್ನು ತೋರಿಸಿತು. ವಿವಿಧ ಭಾಷೆಯ ಭಕ್ತಿ ಸಂಗೀತ ಹಾಗೂ ಜನಪದ-ಶಾಸ್ತ್ರೀಯ ಕಲೆಗಳ ಮನೋಹರ ಪ್ರದರ್ಶನಗೊಂಡವು.
ಕಾರ್ಯಕ್ರಮದ ಸಮಯದಲ್ಲಿ ಫೌಂಡೇಶನ್‌ನ 10ನೇ ವರ್ಷದ ಉತ್ಸವ ‘ಪಟ್ಲ ದಶಮ ಸಂಭ್ರಮ’ ಕುರಿತ ಘೋಷಣೆ ಮಾಡಲಾಯಿತು, ಇದು ಮಂಗಳೂರಿನಲ್ಲಿ ಅದ್ದೂರಿಯಾಗಿ ಆಚರಿಸಲಾಗುತ್ತದೆ. ನಮ್ಮ ತಂಡ ಮತ್ತು ಯೂರೋಪ್ ಘಟಕದ ಎಲ್ಲ ಸಹಕರರ ಸತತ ಪರಿಶ್ರಮದಿಂದ ಈ ಕಾರ್ಯಕ್ರಮ ಯಶಸ್ವಿಯಾಗಿ ನಡೆದು, ನಮ್ಮ ಫೌಂಡೇಶನ್‌ಗಾಗಿ ಗ್ಲೋಬಲ್ ವೇದಿಕೆಯನ್ನು ಸೃಷ್ಟಿಸಿದೆ. ಇದು ಯಕ್ಷಧ್ರುವ ಪಟ್ಲ ಫೌಂಡೇಶನ್ನಿನ ಪರಂಪರೆಯ ಪರಿಮಳವನ್ನು ಜಗತ್ತಿಗೆ ತಲುಪಿಸುವ ದಿಶೆಯಲ್ಲಿ ಮತ್ತೊಂದು ಹೆಜ್ಜೆ !
