ಬದಿಯಡ್ಕ: ಬದಿಯಡ್ಕದ ಶ್ರೀ ಭಾರತೀ ವಿದ್ಯಾಪೀಠದಲ್ಲಿ ವ್ಯಂಗ್ಯಚಿತ್ರ ರಚನಾ ಕಾರ್ಯಾಗಾರವು ದಿನಾಂಕ 09 ನವೆಂಬರ್ 2024ರ ಶನಿವಾರದಂದು ನಡೆಯಿತು.
ಕಾರ್ಯಕ್ರಮದಲ್ಲಿ ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿದ ಖ್ಯಾತ ವ್ಯಂಗ್ಯಚಿತ್ರಗಾರ ಹಾಗೂ ಪತ್ರಕರ್ತ ವಿರಾಜ್ ಅಡೂರು ಮಾತನಾಡಿ “ವ್ಯಂಗ್ಯಚಿತ್ರಗಳು ಸಾಮಾಜಿಕ ನ್ಯೂನತೆಗಳನ್ನು ಹಾಸ್ಯಲೇಪನದ ಮೂಲಕ ತೋರಿಸಿ, ಆದರ ಗಂಭೀರತೆಯನ್ನು ಜನತೆಗೆ, ಇಲಾಖೆಗಳಿಗೆ ಮನ ಮುಟ್ಟುವಂತೆ ನೀಡುತ್ತದೆ. ವ್ಯಂಗ್ಯಚಿತ್ರ ಕಲೆ ಕರಗತವಾಗಬೇಕಾದರೆ, ಭಾವಪೂರ್ಣವಾದ ಚಿತ್ರ ರಚನೆಯ ಜತೆಗೆ ಹಾಸ್ಯ ಪ್ರಜ್ಞೆಯೂ ಬೇಕು. ವಿಚಾರಗಳ ಮಂಡನೆಯೂ ಶಕ್ತಿಯುತವಾಗಿರಬೇಕು.” ಎಂದು ಹೇಳಿದರು.
ಕಾರ್ಯಕ್ರಮವನ್ನು ಉದ್ಘಾಟಿಸಿದ ಶ್ರೀ ಭಾರತೀ ವಿದ್ಯಾಪೀಠದ ಮುಖ್ಯ ಶಿಕ್ಷಕ ಪಿ. ಸತ್ಯನಾರಾಯಣ ಶರ್ಮ ಮಾತನಾಡಿ “ಕಾರ್ಟೂನ್ ಚಿತ್ರಗಳ ಪ್ರತಿಯೊಂದು ಗೆರೆಗಳೂ ಕೂಡಾ ಅತ್ಯಂತ ಸೂಕ್ಷ್ಮ. ಗೆರೆಗಳ ಮೂಲಕ ವಿಚಾರಗಳ ಅನಾವರಣ ಅದ್ಭುತ.” ಎಂದು ಹೇಳಿದರು.
ಶಿಕ್ಷಕಿ ಮಮತಾ ಸಾವಿತ್ರಿ ಪ್ರಾಸ್ತಾವಿಕವಾಗಿ ಮಾತನಾಡಿ ಸ್ವಾಗತಿಸಿ, ವಿದ್ಯಾರ್ಥಿನಿ ಪ್ರಜ್ಞಾ ವಂದಿಸಿದರು. ಶಿಬಿರದಲ್ಲಿ ಭಾಗವಹಿಸಿದ್ದ ಅವ್ಯಂಗ್, ವಂಶಿ ಹಾಗೂ ತಸ್ವಿ ತಮ್ಮ ಅನಿಸಿಕೆ ಹಂಚಿಕೊಂಡರು . ಶಿಬಿರದಲ್ಲಿ 30ಕ್ಕೂ ಹೆಚ್ಚಿನ ಮಕ್ಕಳು ಭಾಗವಹಿಸಿದ್ದರು.
