ಪುತ್ತೂರು : ‘ಬಹುವಚನಂ’ ವತಿಯಿಂದ ‘ಜನಪದ ತಾಳತಂಬೂರಿ’ ಕಾರ್ಯಕ್ರಮವು ದರ್ಬೆ, ವಿದ್ಯಾನಗರ, ಪದ್ಮಿನೀ ಸಭಾಭವನದಲ್ಲಿ ದಿನಾಂಕ 21-01-2024ರಂದು ಸಂಜೆ 4.30ಕ್ಕೆ ನಡೆಯಲಿದೆ. ಹಳೆಪುರ ಮಾದಶೆಟ್ಟಿ, ಗುರುಸಿದ್ಧ ಶೆಟ್ಟಿ ಮತ್ತು ಎಚ್.ಎಂ. ಸ್ವಾಮಿ ಇವರುಗಳು ತಾಳತಂಬೂರಿ ಪದಗಾಯನವನ್ನು ನಡೆಸಿಕೊಡಲಿದ್ದಾರೆ.
ದಕ್ಷಿಣ ಕನ್ನಡದ ಪುತ್ತೂರಿನ ದರ್ಬೆಯ ವಿದ್ಯಾನಗರದಲ್ಲಿ ‘ಬಹುವಚನಂ’ ಎಂಬ ಸಂಸ್ಥೆಯು 2005ನೇ ಇಸವಿಯಲ್ಲಿ ಪ್ರಾರಂಭವಾಗಿ ನಿರತ ನಿರಂತ ಎಂಬ ಸಂಸ್ಥೆಯ ನಿಕಟ ಸಂಬಂಧವನ್ನು ಹೊಂದಿದ್ದು, ಪ್ರಾರಂಭದ ದಿನಗಳಲ್ಲಿ ರಾಮನವಮಿಯ ಆಚರಣೆಯ ಸಂದರ್ಭದಲ್ಲಿ ರಾಮನ ಕುರಿತಾದ ಉಪನ್ಯಾಸ ಸಂಗೀತ ಕಚೇರಿಗಳನ್ನು ಏರ್ಪಡಿಸುತ್ತಾ ಬಂದಿದೆ. ಸಭ್ಯ ಪ್ರೇಕ್ಷಕರನ್ನು ಸೃಷ್ಟಿ ಮಾಡುವ ಉದ್ದೇಶದೊಂದಿಗೆ ಯುವ ಪ್ರತಿಭೆಗಳನ್ನು ಪ್ರೋತ್ಸಾಹಿಸುವುದು, ಅಳಿದು ಹೋಗುತ್ತಿರುವ ಕಲಾಪರಂಪರೆಗಳನ್ನು ಪುನರುಜ್ಜೀವನಗೊಳಿಸುವ ಪ್ರಯತ್ನದಲ್ಲಿ ಈ ಸಂಸ್ಥೆ ಸಾಗಿದೆ. ಕೇವಲ ಸಾತ್ವಿಕ ಕಾರ್ಯಕ್ರಮಗಳನ್ನು ಮಾತ್ರ ಹಮ್ಮಿಕೊಳ್ಳುವ ಈ ಸಂಸ್ಥೆ ಸುಮನಸರು ನಡೆಸುವ ಯಾವುದೇ ಕಾರ್ಯಕ್ರಮಗಳಿಗೆ ಸಭಾಭವನವನ್ನು ಶನಿವಾರ ಆದಿತ್ಯವಾರದ ದಿನಗಳಲ್ಲಿ ಉಚಿತವಾಗಿ ನೀಡುತ್ತದೆ.
