ಮಂಗಳೂರು: ‘ನಿಲ್ಲದ ಮನವಲ್ಲಿ ಪೋಗದೆ ಕಳುಹಿಸಲಾಗದೆ…’ ಪ್ರಾಣವಲ್ಲಭ ಭಾಗವತೆ ಶಾಲಿನಿ ಹೆಬ್ಬಾರ್ ಮಧುರ ರಾಗ ಚಾರುಕೇಶಿಯಲ್ಲಿ ದಕ್ಷಾಧ್ವರ ಪ್ರಸಂಗದ ಈ ಪದವನ್ನು ಏರುಧ್ವನಿಯಲ್ಲಿ ಹಾಡುತ್ತಿದ್ದರೆ, ಅವರ ಗುರು ಲೀಲಾವತಿ ಬೈಪಾಡಿತ್ತಾಯ ಅವರ ಭಾವಚಿತ್ರದ ಮೇಲೆ ದೃಷ್ಟಿ ನೆಟ್ಟಿದ್ದ ಯಕ್ಷಗಾನಪ್ರಿಯರ ಕಣ್ಣುಗಳು ಮಂಜಾಗಿದ್ದವು.
ಈಚೆಗೆ ನಿಧನರಾದ ಬಜಪೆ ಸಮೀಪದ ತಲಕಲ ನಿವಾಸಿ, ಯಕ್ಷಗಾನ ಕ್ಷೇತ್ರದಲ್ಲಿ ಮಹಿಳಾ ಕ್ರಾಂತಿಗೆ ಕಾರಣರಾದ ಲೀಲಾವತಿ ಬೈಪಾಡಿತ್ತಾಯ ಅವರ ಮನೆಯ ಸಮೀಪದ ಕಾಶಿ ವಿಶ್ವನಾಥೇಶ್ವರ ಮಹಾಗಣಪತಿ ದೇವಸ್ಥಾನದಲ್ಲಿ ದಿನಾಂಕ 26 ಡಿಸೆಂಬರ್ 2024ರ ಗುರುವಾರ ನಡೆದ ‘ಗಾನ ನಮನ’ ಕಾರ್ಯಕ್ರಮದಲ್ಲಿ ಲೀಲಾವತಿ ಅವರ ಶಿಷ್ಯರು ಮತ್ತು ಅಭಿಮಾನಿಗಳು ಯಕ್ಷಗಾನದ ಪದಗಳನ್ನು ಹಾಡಿ ಅಗಲಿದ ಕಲಾವಿದೆಯನ್ನು ಸ್ಮರಿಸಿದರು.
‘ನಿಲ್ಲದ ಮನವಲ್ಲಿ ಪೋಗದೆ…’ ಹಾಡಿಗೂ ಮೊದಲು ‘ಕಾಮಿನಿ ಮಣಿ ಕೇಳು..’ ಹಾಡಿಗೆ ಸಭಿಕರ ಒತ್ತಾಯದ ಮೇರೆಗೆ ಲೀಲಾವತಿ ಅವರ ಪತಿ ಹರಿನಾರಾಯಣ ಬೈಪಾಡಿತ್ತಾಯರು ಮದ್ದಲೆ ನುಡಿಸಿದರೆ ಪುತ್ರ ಅವಿನಾಶ್ ಬೈಪಾಡಿತ್ತಾಯ ಚೆಂಡೆ ಸಹಕಾರ ನೀಡಿದರು. ವಾಲಿಮೋಕ್ಷ ಪ್ರಸಂಗದ ‘ಕರುಣವಿಷ್ಟೇ ಸಾಕು..’ ಹಾಡು ಹಿಂದೋಳ ರಾಗದಲ್ಲಿ ತೇಲಿಬಂದು ಕಲಾಪ್ರಿಯರ ಹೃದಯ ಕಲಕಿತು.
ಕಾರ್ಯಕ್ರಮದಲ್ಲಿ ಲೀಲಾವತಿ ಅವರ ನೆನಪಿನಲ್ಲೇ ಬರೆದ ಹಾಡುಗಳು ಕೂಡ ಕೇಳಿಬಂದವು. ಬೆಳ್ಳಾರೆ ಮಂಜುನಾಥ ರಚಿಸಿದ ‘ಪರಮ ಷಡುರಸ ಭೋಜನದ ಸವಿ…’ಯನ್ನು ಶಾಲಿನಿ ಅವರು ಭೈರವಿ ಮತ್ತು ಕಲ್ಯಾಣಿ ರಾಗಗಳ ಮಾಲಿಕೆಯಲ್ಲಿ ಹೆಣೆದು ಹಾಡಿದರೆ, ಭಾಗವತ ಕರುಣಾಕರ ಶೆಟ್ಟಿಗಾರ್ ಕಾಶಿಪಟ್ಣ ಅವರು ಧರ್ಮಸ್ಥಳ ಮೇಳದ ಗಿರೀಶ್ ಹೆಗಡೆ ಬರೆದ ‘ಕನ್ನಡಾಂಬೆಯ ದಿವ್ಯ ಕಲೆ ಕಲಾವಿದರೆಲ್ಲ ಕನ್ನಡಿಯಹುದು ಸಂಸ್ಕೃತಿಗೆ…’ ಹಾಡನ್ನು ಮಧ್ಯಮಾವತಿ ರಾಗದಲ್ಲಿ, ‘ಅಳಿವು ಜೀವಿಗೆ ಸಹಜವಾದರೂ ನಲಿದು ಬಳಸಿದ ದಿನವೆ ಸುಂದರ…’ ಮತ್ತು ‘ಜನನದಲೆ ಕೊನೆದಿನದ ಗಳಿಗೆಯನೆಣಿಸಿ ಕಳುಹುವ ದೇವ…’ವನ್ನು ಮೋಹನ ರಾಗದಲ್ಲಿ ಪ್ರಸ್ತುತಪಡಿಸಿದರು.
ಲೀಲಾವತಿ ಅವರ ಶಿಷ್ಯರಾದ ದಿವ್ಯಶ್ರೀ ಮತ್ತು ಮುರಾರಿ ಭಟ್ ಅವರೂ ಹಾಡಿದರು. ಚಂಡೆ ಮದ್ದಳೆಯಲ್ಲಿ ಆನಂದ ಗುಡಿಗಾರ್, ಗಿರೀಶ್ ಕಿನಿಲಕೋಡಿ ಮತ್ತು ಚಂದ್ರಶೇಖರ ಕೊಂಕಣಾಜೆ ಸಹಕರಿಸಿದರು. ಪ್ರದೀಪ್‌ ಕುಮಾರ್ ಕಲ್ಕೂರ, ಪ್ರಭಾಕರ ರಾವ್ ಪೇಜಾವರ, ಸಂಜಯ ರಾವ್ ಮತ್ತು ಶರವು ಶ್ರೀನಿವಾಸ ರಾವ್ ನುಡಿನಮನ ಸಲ್ಲಿಸಿದರು.
