ಮೈಸೂರು : ರಂಗವಲ್ಲಿ ಪ್ರಸ್ತುತ ಪಡಿಸುವ ಪ್ರಶಾಂತ್ ಹಿರೇಮಠ್ ಪರಿಕಲ್ಪನೆ ಮತ್ತು ನಿರ್ದೇಶನದ ಶ್ರೀನಿವಾಸ ವೈದ್ಯರ ಬರಹಗಳನ್ನಾಧರಿಸಿದ ನಾಟಕ ‘ಪಾರ್ಶ್ವಸಂಗೀತ’ವು ದಿನಾಂಕ 30-09-2023, 01-10-2023, 07-10-2023 ಮತ್ತು 08-10-2023ರಂದು ಸಂಜೆ ಗಂಟೆ 6.30ಕ್ಕೆ ಮೈಸೂರಿನ ಕಿರುರಂಗ ಮಂದಿರದಲ್ಲಿ ಪ್ರದರ್ಶನಗೊಳ್ಳಲಿದೆ.
ಪಾರ್ಶ್ವಸಂಗೀತ ನಾಟಕವು 1940ರ ದಶಕದಿಂದ 70ರ ದಶಕಗಳವರೆಗಿನ ಆದರೆ ಇಂದಿಗೂ ಜನಮಾನಸದಲ್ಲಿ ಉಳಿದಿರುವ ಹಿಂದಿ ಚಿತ್ರಗೀತೆಗಳೊಂದಿಗಿನ ಅವಿನಾಭಾವ ಸಂಬಂಧವನ್ನು ತೆರೆದಿಡುತ್ತದೆ. ಸಿನಿಮಾ ಎನ್ನುವುದು ಸಭ್ಯರಿಗಲ್ಲ ಎನ್ನುವ ಕರ್ಮಠ ಕುಟುಂಬದಲ್ಲಿ ಸಿನಿಮಾ ಹಾಡುಗಳ ಗೀಳು ಹಚ್ಚಿಸಿಕೊಂಡು, ಸಿನಿಮಾ ಗೀತೆಗಳಿಗಾಗಿ ಮನೆಯವರೊಡನೆ ಜಗಳ ಕಾಯುವ ತನ್ನ ಚಿಕ್ಕಪ್ಪ; ಶಾಮ ಚಿಕ್ಕಪ್ಪನ ಕತೆ ಹೇಳುವ ಹಿರಿಯ ಜೀವದ ನೆನಪುಗಳ ಸರಮಾಲೆ ಈ ‘ಪಾರ್ಶ್ವಸಂಗೀತ’ ನಾಟಕ.
