ಮಂಗಳೂರು : ಇಂಡಿಯನ್ ನ್ಯಾಷನಲ್ ಟ್ರಸ್ಟ್ ಫಾರ್ ಆರ್ಟ್ ಆ್ಯಂಡ್ ಕಲ್ಚರಲ್ ಹೆರಿಟೇಜ್ (ಇಂಟಾಕ್) ನ ಮಂಗಳೂರು ವಿಭಾಗವು ವಿಶ್ವ ಪರಂಪರೆಯ ಸಪ್ತಾಹದ ಆಚರಣೆಯ ಅಂಗವಾಗಿ ಸಪ್ತಾಹದ ಸರಣಿಯಲ್ಲಿ ನಾಲ್ಕನೇ ಕಾರ್ಯಕ್ರಮವಾಗಿ ಆಯೋಜಿಸಿದ ಕಾವಿ ಕಲಾ ಪರಂಪರೆ ಕುರಿತು ಉಪನ್ಯಾಸವು ದಿನಾಂಕ 22 ನವೆಂಬರ್ 2024ರಂದು ಕೊಡಿಯಾಲ್‌ಗುತ್ತು ಕಲೆ ಮತ್ತು ಸಂಸ್ಕೃತಿ ಕೇಂದ್ರದಲ್ಲಿ ನಡೆಯಿತು.
ಈ ಸ್ಥಳೀಯ ಮತ್ತು ಬಹುಮುಖ ಕಲಾ ಪ್ರಕಾರದ ಐತಿಹಾಸಿಕ ವಿಕಸನದ ಕುರಿತು ಖ್ಯಾತ ಕಲಾವಿದ ಮತ್ತು ಕಾವಿ ಕಲೆ ಕ್ಷೇತ್ರದ ಸಂಶೋಧಕ ಡಾ. ಜನಾರ್ದನ ರಾವ್ ಹಾವಂಜೆಯವರು ವಿವರವಾದ ಪ್ರಸ್ತುತಿಯನ್ನು ನೀಡಿದರು. ಸುಣ್ಣ, ಕೆಂಪು ಮಣ್ಣು ಮತ್ತು ಮರಳಿನಂತಹ ನೈಸರ್ಗಿಕ ವಸ್ತುಗಳನ್ನು ಬಳಸಿ, ವಿಭಿನ್ನ ಶೈಲಿಗಳನ್ನು ಅಳವಡಿಸಿಕೊಳ್ಳುವ ಸಾಮರ್ಥ್ಯ ಹೊಂದಿದೆ. ಡಾ. ಹಾವಂಜೆಯವರ ಪ್ರಸ್ತುತಿಯು ಕೊಂಕಣ ಕರಾವಳಿಯಾದ್ಯಂತ ದೇವಾಲಯಗಳು, ಚರ್ಚ್ ಮತ್ತು ಖಾಸಗಿ ಮನೆಗಳಲ್ಲಿ ಕಾವಿ ಕಲೆಯನ್ನು ಪ್ರದರ್ಶಿಸುವ ಛಾಯಾಚಿತ್ರಗಳನ್ನು ಒಳಗೊಂಡಿತ್ತು. ಕಾವಿ ಕಲೆ ನಿಯಮಿತ ರೂಪರೇಷೆಗಳಿಲ್ಲದ ವಿಧಾನ ಆಧಾರಿತ ಕಲೆ, ಇದು ವಿಭಿನ್ನ ಕಲಾಶೈಲಿಗಳನ್ನು ಸೇರಿಸಲು ಅನುಕೂಲಕರವಾಗಿದೆ ಎಂದು ಅವರು ವಿವರಿಸಿದರು. ತಮ್ಮ ವ್ಯಾಪಕವಾದ ಪಿಎಚ್‌ಡಿ ಸಂಶೋಧನೆಯನ್ನು ಆಧರಿಸಿ ಮಾತನಾಡಿದ ಅವರು ಈ ಕಲೆಯನ್ನು ಉಳಿಸಿಕೊಳ್ಳುವ ಅಗತ್ಯವನ್ನು ವಿಶ್ಲೇಷಿಸಿದರು, ಆಧುನಿಕ ಅಭಿವೃದ್ಧಿ ಚಟುವಟಿಕೆಗಳಿಗೆ ಅನೇಕ ಕಾವಿ ಕಲಾಕೃತಿಗಳು ಕಳೆದುಹೋಗಿವೆ ಎಂದು ವಿಷಾದಿಸಿದರು. ಇಂದು ಕಾವಿ ಕಲೆಗಾಗಿ ಭೌಗೋಳಿಕ ಸೂಚಕ ಟ್ಯಾಗ್‌ಗಾಗಿ ಹೋರಾಟ ನಡೆಯುತ್ತಿದೆ, ಆದರೆ ಕಾವಿ ಕಲೆ ಸಂಪೂರ್ಣ ಕರಾವಳಿಯ ಪರಂಪರೆಯಾಗಿದ್ದು, ಅದರ ಮಹತ್ವವನ್ನು ಸಂರಕ್ಷಿಸಲು ಮತ್ತು ಗುರುತಿಸಲು ಸಾಮೂಹಿಕ ಪ್ರಯತ್ನ ಅತ್ಯಗತ್ಯ ಎಂದು ಹೇಳಿದರು.
ಇಂಟಾಕ್ ಮಂಗಳೂರು ವಿಭಾಗದ ಸಂಚಾಲಕ ಸುಭಾಸ್ ಚಂದ್ರ ಬಸು ಸ್ವಾಗತಿಸಿ, ಉಪನ್ಯಾಸಕರನ್ನು ಪರಿಚಯಿಸಿದರು. ಇಂಟಾಕ್ ಸದಸ್ಯೆ ಕ್ಯಾರೋಲಿನ್ ಡಿಸೋಜಾ ವಂದಿಸಿದರು. ಡಾ. ಹಾವಂಜೆಯವರನ್ನು ಈ ಸಂದರ್ಭ ಸನ್ಮಾನಿಸಲಾಯಿತು.
