ಮಂಗಳೂರು : ಸಂಗೀತ ಭಾರತಿ ಪ್ರತಿಷ್ಠಾನ (ರಿ) ಮಂಗಳೂರು ಇದರ ವತಿಯಿಂದ ಹಿಂದುಸ್ತಾನಿ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮವನ್ನು ದಿನಾಂಕ 27 ಅಕ್ಟೋಬರ್ 2024ರಂದು ಸಂಜೆ 5-30 ಗಂಟೆಗೆ ಮಂಗಳೂರಿನ ಪುರಭವನದಲ್ಲಿ ಆಯೋಜಿಸಲಾಗಿದೆ. ಅಂತಾರಾಷ್ಟ್ರೀಯ ಮಟ್ಟದ ಖ್ಯಾತಿಯ ಬಾನ್ಸುರಿ ವಾದಕ ರಾಕೇಶ್ ಚೌರಾಸಿಯ ಇವರ ಬಾನ್ಸುರಿ ವಾದನ ನಡೆಯಲಿದ್ದು, ಇವರಿಗೆ ಪ್ರಖ್ಯಾತ ತಬಲ ಪಟು ಮುಂಬಯಿಯ ಓಜಸ್ ಅದಿಯಾ ಸಹಕಾರ ನೀಡಲಿದ್ದಾರೆ. ಇದಾದ ಬಳಿಕ ಹೆಸರಾಂತ ಸಿತಾರ್ ವಾದಕ ಉಂದಿನ ಪಂಡಿತ್ ಪೂರ್ಬಯಾನ್ ಚಟರ್ಜಿ ಇವರ ಸಿತಾರ್ ವಾದನ ನಡೆಯಲಿದೆ. ಇವರಿಗೆ ತಬಲದಲ್ಲಿ ಮುಂಬಯಿಯ ಪ್ರಖ್ಯಾತ ತಬಲ ವಾದಕರಾದ ಸತ್ಯಜಿತ್ ತಲ್ವಾಕರ್ ಸಾಥ್ ನೀಡಲಿದ್ದಾರೆ.
ಈ ಹಿಂದುಸ್ತಾನಿ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮಕ್ಕೆ ಕೆನರಾ ಬ್ಯಾಂಕ್ ಮುಖ್ಯ ಪ್ರಯೋಜಕರಾಗಿದ್ದು, ಸಹಪ್ರಯೋಜಕರಾಗಿ ಐಡಿಯಲ್ ಐಸ್ ಕ್ರೀಮ್, ಎಂ.ಆರ್‌.ಪಿ.ಎಲ್. ಮತ್ತು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಸಹಕಾರ ನೀಡಲಿದ್ದಾರೆ. ಇದೊಂದು ಅಪರೂಪ ಹಾಗೂ ವಿಶೇಷ ಕಾರ್ಯಕ್ರಮವಾಗಿದ್ದು, ವಿಶ್ವದ ಶ್ರೇಷ್ಠ ಸಂಗೀತ ವೇದಿಕೆಯಲ್ಲಿ ಹಾಗೂ ಸಂಗೀತ ದಿಗ್ಗಜರೊಂದಿಗೆ ನುಡಿಸಿರುವ ಹಿಂದುಸ್ತಾನಿ ಶಾಸ್ತ್ರೀಯ ಸಂಗೀತದ ಹಿರಿಯ ಕಲಾವಿದರು ಕಾರ್ಯಕ್ರಮವನ್ನು ಪ್ರಸ್ತುತ ಪಡಿಸಲಿದ್ದಾರೆ. ಈ ಕಾರ್ಯಕ್ರಮಕ್ಕೆ ಮುಕ್ತ ಪ್ರವೇಶ ಇದ್ದು, ಸಂಗೀತಾಸಕ್ತರು, ಸಂಗೀತ ಶಿಕ್ಷಕರು. ವಿದ್ಯಾರ್ಥಿಗಳು ಇದರ ಸದುಪಯೋಗಪಡಿಸಿಕೊಳ್ಳಬಹುದಾಗಿದೆ ಎಂದು ಸಂಗೀತ ಭಾರತಿಯ ಉಪಾಧ್ಯಕ್ಷ ಪ್ರೊ.ನರೇಂದ್ರ ಎಲ್. ನಾಯಕ್ ತಿಳಿಸಿದ್ದಾರೆ.
ರಾಕೇಶ್ ಚೌರಾಸಿಯಾ
ರಾಕೇಶ್ ಚೌರಾಸಿಯಾ ಇವರು ದೇಶ ಕಂಡ ಸರ್ವ ಶ್ರೇಷ್ಠ ಬಾನ್ಸುರಿ ವಾದಕರಲ್ಲಿ ಓರ್ವರಾಗಿದ್ದಾರೆ. ಖ್ಯಾತ ಕೊಳಲು ವಾದಕ ಹರಿಪ್ರಸಾದ್ ಚೌರಾಸಿಯಾ ಇವರ ಸೋದರಳಿಯ. 2007ರಲ್ಲಿ ಭಾರತದ ಗೌರವಾನ್ವಿತ ರಾಷ್ಟ್ರಪತಿ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಇವರಿಂದ ‘ಭಾರತೀಯ ಸಂಗೀತ ಅಕಾಡೆಮಿ’ ಪ್ರಶಸ್ತಿ, 2008ರಲ್ಲಿ ‘ಆದಿತ್ಯ ಬಿರ್ಲಾ ಕಲಾಕಿರಣ ಪುರಸ್ಕಾರ’ ಮತ್ತು 2011ರಲ್ಲಿ ‘ಗುರು ಶಿಷ್ಯ ಪ್ರಶಸ್ತಿ’ಯನ್ನು ಪಡೆದಿದ್ದಾರೆ. ತಮ್ಮ ಸಹಯೋಗದ ಸಂಗೀತ ಆಲ್ಬಂ ಆಸ್ ವಿ ಸ್ಪೀಕ್‌ಗಾಗಿ ಎರಡು ‘ಗ್ರ್ಯಾಿಮಿ ಪ್ರಶಸ್ತಿ’ ದೊರೆತಿದೆ.
ಪೂರ್ಬಯನ್ ಚಟರ್ಜಿ
ಓರ್ವ ಸರ್ವಶ್ರೇಷ್ಠ ಭಾರತೀಯ ಸಿತಾರ್ ವಾದಕರಾಗಿರುವ ಪೂರ್ಬಯನ್ ಚಟರ್ಜಿ ಇವರು, ತಂದೆ ಪಾರ್ಥಪ್ರತಿಮ್ ಚಟರ್ಜಿಯವರಿಂದ ಸಿತಾರ್ ಕಲಿತರು. 2013ರಲ್ಲಿ ಚಟರ್ಜಿಯವರು ಕೋಲ್ಕತ್ತಾ ನಗರಕ್ಕಾಗಿ ತೋಮೇಕ್ ಚಾಯ್ ಬೋಲೆ ಬಂಚಿ (ನಾನು ನಿನಗಾಗಿ ಹಂಬಲಿಸುತ್ತಿರುವಂತೆ ಬದುಕುತ್ತೇನೆ) ಎಂಬ ಗೀತೆಯನ್ನು ರಚಿಸಿದರು. ಜೊತೆಗೆ ಶ್ರೀಜಾತೋ ಇವರ ಹಿಂದಿ ಮತ್ತು ಬೆಂಗಾಲಿ ಸಾಹಿತ್ಯದೊಂದಿಗೆ ಮತ್ತು ಬಿಕ್ರಮ್ ಘೋಷ್ ಇವರ ಇಂಗ್ಲೀಷ್ ಸಾಹಿತ್ಯದೊಂದಿಗೆ ರಚಿಸಿದ್ದರು. ಈ ಮೂಲಕ ಅಧಿಕೃತ ಗೀತೆಯನ್ನು ಹೊಂದಿರುವ ನಗರ ಖ್ಯಾತಿಯನ್ನು ಪಡೆದಿದೆ. ಚಟರ್ಜಿಯವರು 15ನೇ ವಯಸ್ಸಿನಲ್ಲಿ ದೇಶದ ಅತ್ಯುತ್ತಮ ವಾದ್ಯಗಾರರಾಗಿ ಭಾರತದ ರಾಷ್ಟ್ರಪತಿಯವರಿಂದ ಪ್ರಶಸ್ತಿಯನ್ನು ಪಡೆದಿದ್ದು, ‘ಆದಿತ್ಯ ವಿಕ್ರಮ್ ಬಿರ್ಲಾ ಪ್ರಶಸ್ತಿ’, 1995ರಲ್ಲಿ ರೋಟರಿ ಇಂಟರ್ ನ್ಯಾಷನಲ್‌ನಿಂದ ‘ರಸೋಯಿ ಪ್ರಶಸ್ತಿ’ ದೊರೆತಿದೆ.
