ಕವನ | ಬುದ್ಧ ಬಂದಾನಾ ನಡುಮನೆಗೆ

ಅದೋ ಅವನು ಬಂದಿದ್ದಾನೆ
ವಿಶಾಲ ಅಂಗಳದ ಅಮೃತಶಿಲೆಯಲ್ಲಿ
ಅವಿತು ಮೌನಿಯಾಗಿದ್ದಾನೆ
ತ್ರಿಸರಣ ತ್ರಿಪಿಠಕಗಳ ಸದ್ದಿನಲಿ
ಸುತ್ತ ಕತ್ತಲಿನ
ಬೆಳಕಿಂಡಿಗಳ ಹುಡುಕಾಡುತ್ತಾ
ದಣಿದ ಕಣ್ಣುಗಳ ಮುಚ್ಚಿದ್ದಾನೆ
ಅವ ಬಂದಾನಾ ನಡುಮನೆಗೆ ?

ರಥಬೀದಿಯ ಹೊಳಹು
ಊರುಕೇರಿಗಳನು ಬೆಳಗಿಸಿದೆ
‘ಗಚ್ಛಾಮಿ’ಗಳ ಸಮೂಹ ನಾದ
‘ಸಮ್ಮಾ ಸಂಬುದ್ಧನ’ ಸ್ಮರಣೆ
ಜಗದಗಲ ಸುಪ್ತ ನಾಡಿಗಳಲ್ಲಿ
ಧ್ವನಿಸುತ್ತಿರುವಾಗ
ಅವನ ಚಹರೆಯಲಿ ಸಿಕ್ಕುಗಳಿವೆ
ಅವ ಬಂದಾನಾ ನಡುಮನೆಗೆ ?

ಹಸಿವಿನ ಹಂದರದ ಕೂಗು
ಸೂರಿಲ್ಲದ ಕೂಸುಗಳ ಬಯಲದನಿ
ಉತ್ಸವಗಳ ಹಿತ್ತಲಿನಲಿ
ಕೈಚಾಚಿದ ಅಸಹಾಯಕ ಜೀವಗಳು
ಮುಟ್ಟಿದ ಪಾಪ ಅಪ್ಪಿದ
ಅಪರಾಧಗಳಿಗೆ ಜೀವ ತೆತ್ತ
ಅಮಾಯಕರ ಎದೆಯೊಳಗಿಂದ
ಅವ ಬಂದಾನಾ ನಡುಮನೆಗೆ ?

ಧೂಪ ದೀಪಾರಾಧನೆಗಳ
ವಿಜೃಂಭಣೆಯ ಜಾತ್ರೆಗಳಾಚೆ
ದೂರ ಬಯಲಿನಲೊಂದು
ಒಂಟಿ ‘ಭೋದಿ’
ಚಿಗುರು ಮುದಿಯೆಲೆಗಳ
ಕಲರವದಲಿ ಮಿಂದು
ತನ್ನ ಕಂದನಿಗಾಗಿ ಕೈಬೀಸುತ್ತಿದೆ
ಬುದ್ಧ ಬಂದಾನಾ ನಡುಮನೆಗೆ ?

Divakar N.
1898 Ground floor
3rd cross, Near Viveka Vidyalaya
Srirampura 3rd stage, Mysore -570023