ಮಂಗಳೂರು : ಶಾಸ್ತ್ರೀಯ ಭರತನಾಟ್ಯದ ಗ್ರಹಿಕೆ-ಅರಿಕೆ-ಮೆಚ್ಚಿಕೆಯ ಬಗೆಯನ್ನು ತಿಳಿಯುವ ನಿಟ್ಟಿನಲ್ಲಿ ಡಾ. ಭ್ರಮರಿ ಶಿವಪ್ರಕಾಶರ ಕಿರು ಭರತನಾಟ್ಯ ಪ್ರದರ್ಶನ ಹಾಗೂ ಸಂವಾದ ಕಾರ್ಯಕ್ರಮ ‘ಆಸ್ವಾದ’ವನ್ನು ದಿನಾಂಕ 26 ಸೆಪ್ಟೆಂಬರ್ 2026ರ ಶನಿವಾರ ಸಂಜೆ 5-30 ಗಂಟೆಗೆ ಮಂಗಳೂರಿನ ಹಿಂದಿ ಪ್ರಚಾರ ಭವನದಲ್ಲಿ ಆಯೋಜಿಸಲಾಗಿದೆ.
ಮಣಿಪಾಲದ ಎಂ.ಪಿ.ಇ.ಎ.ಎಸ್. ಟ್ರಸ್ಟಿನ ಅಧ್ಯಕ್ಷರಾದ ಡಾ. ವರದೇಶ್ ಹಿರೇಗಂಗೆಯವರು ಕಾರ್ಯಕ್ರಮದ ಶುಭಾರಂಭವನ್ನು ಮಾಡಲಿದ್ದು, ಈ ಕಲೆಯ ಬಗೆಗಿನ ಸಂವೇದನೆಯನ್ನು ಬೆಳೆಸುವ ಸಂವಾದವನ್ನು ನಡೆಸಲಿದ್ದಾರೆ. ಕವಯಿತ್ರಿ ಪ್ರೊ. ಸ್ಮಿತಾ ಶೆಣೈಯವರು ಕಾರ್ಯಕ್ರಮವನ್ನು ನಿರೂಪಿಸಲಿದ್ದು ಸಂವಾದದಲ್ಲಿ ಭಾಗವಹಿಸಲಿದ್ದಾರೆ. 2023ರಿಂದ ನಡೆದುಕೊಂಡು ಬರುತ್ತಿರುವ ನಾದನೃತ್ಯ ತಿಂಗಳ ಸರಣಿ ಕಾರ್ಯಕ್ರಮದ ಅಂಗವಾಗಿ ಈ ಪ್ರದರ್ಶನವಿದ್ದು, ಬೆಂಗಳೂರಿನ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಕಾರವನ್ನು ಪಡೆದಿದೆ. ಕಲಾಸಕ್ತರಿಗೆ ಹಾಗೂ ವಿದ್ಯಾರ್ಥಿಗಳಿಗೆ ಮುಕ್ತ ಪ್ರವೇಶವಿದೆ.
