ಶಿವಮೊಗ್ಗ : ಜಿಲ್ಲಾ ಕನ್ನಡ ಸಾಹಿತ್ಯ ಸಾಂಸ್ಕೃತಿಕ ವೇದಿಕೆ, ಕರ್ನಾಟಕ ಜಾನಪದ ಪರಿಷತ್ತು ಜಿಲ್ಲಾ ಸಮಿತಿ ಮತ್ತು ಶ್ರೀ ಆದಿಚುಂಚನಗಿರಿ ಮಹಾಸಂಸ್ಥಾನ ಮಠದ ಶಿವಮೊಗ್ಗ ಶಾಖೆಯ ನೇತೃತ್ವದಲ್ಲಿ ದಸರಾ ಪ್ರಯುಕ್ತ ದಿನಾಂಕ 18 ಅಕ್ಟೋಬರ್ 2026ರ ಭಾನುವಾರ ಜನಪದ ಗೀತೆಗಳ ವೃಂದಗಾಯನ ಸ್ಪರ್ಧೆಯನ್ನು ಏರ್ಪಡಿಸಲಾಗಿದೆ ಎಂದು ಕರ್ನಾಟಕ ಜಾನಪದ ಪರಿಷತ್ತಿನ ಅಧ್ಯಕ್ಷರಾದ ಡಿ. ಮಂಜುನಾಥ ತಿಳಿಸಿದ್ದಾರೆ.
ಜನಪದ ಗೀತೆಗಳನ್ನು ಹಾಡುವ ಸ್ಪರ್ಧೆ ಪ್ರತಿ ವರ್ಷದಂತೆ ಏರ್ಪಡಿಸಲಾಗುತ್ತಿದ್ದು, ಒಂದು ತಂಡದಲ್ಲಿ ಕನಿಷ್ಠ ಐವರು ಭಾಗವಹಿಸಲು ಕೋರುತ್ತೇವೆ. ವಿದ್ಯಾರ್ಥಿಗಳು, ಮಹಿಳೆಯರು, ಪುರುಷರ ತಂಡಗಳು ಜನಪದ ಹಾಡು ಸ್ಪರ್ಧೆಯಲ್ಲಿ ಭಾಗವಹಿಸಲು ಅವಕಾಶವಿದೆ. ತಂಡಗಳು ಹೆಸರು, ವಿಳಾಸ, ದೂರವಾಣಿ, ಹಾಡಿನ ಹೆಸರು ಬರೆದು ತಿಳಿಸಲು ಕೋರಿದ್ದು, ಗಾಯಕರು ಸೋಬಾನೆ, ಹಸೆ, ಬೀಸುವ, ಕುಟ್ಟುವ, ನಾಟಿಮಾಡುವಾಗಿನ ಹಾಡುಗಳನ್ನು ಹಾಡಲು ಅವಕಾಶವಿದೆ. ಜನಪದ ಗಾದೆಗಳು, ಒಗಟುಗಳನ್ನು ಹೇಳುವ ಸ್ಪರ್ಧೆಯೂ ನಡೆಯಲಿದೆ. ಆಸಕ್ತ ತಂಡಗಳು ದಿನಾಂಕ 05 ಅಕ್ಟೋಬರ್ 2026ರೊಳಗೆ ಮಾಹಿತಿ ನೀಡಲು ವಿನಂತಿಸಲಾಗಿದೆ.
